Gipuzkoako Foru Aldundiko Ingurumeneko Departamentuak 50.000 euro bideratuko ditu bederatzi bailaratako garapen-agentzietara. Asensio ingurumen diputatuak azaldu duenez, helburua da "energia-planak bultzatzea", "energia-pobreziari aurre egitea" eta Gipuzkoako eskualdeetan "energia-eredu jasangarria sustatzea": "GK 2050 Gipuzkoako Klima Aldaketaren Estrategian ezarritako helburuekin bat egitea nahi da (…). Jakitun gara egungo energia-sistema osatzen duten elementuak aldatu eta energia-eredu hipokarboniko baterako trantsizioa bultzatzeko beharrezkoa dela tokiko edo eskualdeko ekintza-planora jaistea".
Hala, garapen-agentziak lau jarduera-eremutan ari dira lanean: energiari buruzko eskualde-elkarrizketak egiten, eskualdeko energiaren planifikazioa eta ekintza garatzen, Eskualdeko Energia Mahaia dinamizatzena, eta, azkenik, Gipuzkoako Energia Jasangarriaren eta Energia Pobreziaren Lurralde Mahaian integratzen.
Debagoienera etorrita, energia berriztagarriak sustatzearekin zerikusia duten proposamenak egin direla aurreratu dute, eta Euskadiko Energia Jasangarritasunaren Legea betetzeko ahaleginak egingo direla adierazi du agentziak.