Gaur, astelehena, aukeratuko dute datozen lau urteotan Gipuzkoako futbol federazioa zuzenduko duen lantaldea, eta baita presidentea ere. Garai Berriak eta Gipuzkoa: Denon Joko Zelaia dira bi plataformak, eta bertako hautagaiak dira Manu Diaz eta Adrian Merino, nahiz eta azken horrek joan den astean atzera pausoa eman zuen.
Gaur hasita Gipuzkoako futbol federazioak lan-talde berria izango du. Donostiako Atano pilotalekuan (18:30ean lehen deialdia, 19:00etan bigarrena) egingo dituzte hauteskundeak eta ikusteko dago Manu Diazen Garai Berriak plataformak, edo Adrian Merinoren Gipuzkoa: Denon Joko Zelaia-k irabaziko duen. Oraingoz azken horiek dute abantaila, urrian egin zituzten teknikarien bozketan boto gehiago jaso zituztelako (115-80). Partida, baina, gaur erabakiko da, Gipuzkoako klubei (78) tokatzen zaie gaur iritzia ematea.