Pozik dago Arrasatekoa, nahiz eta aitortzen duen ezustean harrapatu zuela epaileen erabakiak. Kanporaketekin alderatuz finalean egin beharreko lana zorrotzagoa edo estuagoa izan zela dio Arrasateko bertsolariak: zortziko handian eta txikian kantatu zuten hasteko, seiko motzean gero, eta hamarreko txikian beste ariketa bat segidan, eta, amaitzeko, kartzelako ariketan, bi puntu erantzun behar izan zuten eta bakarkako lanarekin borobildu. Proposatutako gaiak gustatu zitzaizkiola dio.
Finalean, sei bertsolari
Antolatzaileek hamasei bertsolari gonbidatu zituzten sariketan parte hartzera eta horietatik seik eskuratu zuten finalerako txartela; Zuazubiskar eta Aranaz gainera, Eneko Araiztegik, Xabat Illarregik, Aner Peritzek eta Mikel Iturriotzek osatu zuten finaleko seikotea. Guztiak, elkarren aspaldiko lagun eta bertsokideak.
"Erreferentziazko sariketa"
1976an abiatu zuten lehiaketa, eta estimu handia diote bertsolariek eta bertsozaleek. Jon Sarasua, Ainhoa Agirreazaldegi eta Maider Arregi debagoiendarrek irabazi izan dute Zarauzko sariketa aurrez.
