Abuztu amaieran izandako bi kanporaketen ondoren, 44. Lizardi sariketa izan zen atzo Zarautzen. Modelo aretoan egin zen saioa, eta sei izan ziren garaipenaren bila oholtza gainera atera ziren bertsolariak. Debagoienetik bi ordezkari izan ziren: Ane Zuazubiskar arrasatearra eta Oihana Arana eskoriatzarra, eta emaitza bikainekin bueltatu ziren etxera. Izan ere, Zuazubiskar izan zen garaile, eta, segidan, bigarren postua, Oihana Arana eskoriatzarrarentzat izan zen.
Parte-hartzaileen puntuazioa
Irabazlea Ane Zuazubiskar arrasatearra izan zen, finalean, 264 puntu lortuta. Bigarrena Oihana Arana eskoriatzarra sailkatu zen, 260,5 punturekin; hirugarrena Eneko Araiztegi segurarra, 253,5 punturekin; laugarrena Xabat Illarregi leitzarra, 250,5 punturekin; bosgarrena Aner Peritz zarauztarra, 242 punturekin; eta seigarrena Mikel Iturriotz urretxuarra, 239 punturekin.
