Hainbat sektorerengan izango dute eragina neurri berriek, baina batez ere ostalaritza izango da kaltetuena. Astearen amaiera aldera argitaratuko da dekretua, eta astebururako neurriak indarrean egotea espero du sailburuak. Bestetik, jakinarazi du Bergarari eta Tolosari ezarritako neurri murriztaileak indargabetuko direla, agindua argitaratu bezain laster.
Gaueko aisialdia
Gaueko aisialdiari dagokionez, tabernek ezingo dute 01:30ak baino beranduagora arte ireki, eta era berean, ezingo dute 06:00ak baino lehen zabaldu. Gainera, behin 00:00ak gaindituta, tabernen kanpoaldean, terrazan eserita bakarrik kontsumitu ahalko da. Horri lotuta, barrualdean, edukiera %60ra mugatuko da –baita dantza aretoetan ere–.
Ostalaritzako establezimenduak
100 pertsona baino gehiago batu daitezkeen ekitaldietan, edukiera %80ra mugatuko da, 1,5 metroko espazioak errespetatu beharko dira mahaien artean eta ezingo dira 10 pertsona baino gehiagoko taldeak batu. Horrek eragina izango du ezkontza-ospakizun edota gisa horretako jaietan, eta baita sagardotegiak bezalako lokaletan.
Beilatoki eta ehorzketetak
Beilatokietan, edukiera %60ra murriztuko da –bizikide izan ala ez–, eta baita ehorzketetan ere.
Gazteen lokalak
Debekatuta jarraitzen du gazteen lokaletako jardunak
Kaleko ekimenak
Toki finkorik gabe espazio publikoan egiten diren erromeriak edo ekimenak debekatuta daude.
Maskaren erabilera
Lantokietan, ez da nahitaezkoa izango, norberaren mahaian eserita egonez gero eta segurtasun tarteak bermatzen badira. Halere, pasabideetan edota partekatzen diren espazioetan –bilerak, kasu– erabili beharko da.
