Aldundiak azaldu duenez, egoeraren jarraipena egiteko –eta batez ere egoitzetako eskariei eta beharrei erantzuteko– Aita Menniko profesionalen laguntza eskatu dute, eta helburua profesionalek aholkularitza teknikoa modu indibidualizatuan ematea da.
Pandemiari aurre egiteko plangintza egiterakoan, egoitzaren berezko berezitasunak hartzen dituzte kontuan: eraikinak arkitektonikoki dituen mugak eta abantailak, egoiliar eta langile kopurua eta horien osasun egoera edota lan-taldearen antolaketa, besteak beste.
Gipuzkoako adineko egoitzen sarea 65 zentrok osatzen dute, eta guztira 5.425 egoiliar daude horietan. Aita Menniko taldeek egoitza guztiak bisitatuko dituztela esan dute, eta baita zentroen eskari guztiei erantzuna ematen jarraituko dela ere.
