Eider Mendoza foru bozeramailearen arabera, azken egunean ez da adineko pertsonarik hil egoitzetan. Mendozak gaineratu duenez, 21 lagun gehiagok gainditu dute gaixotasuna eta hiruk positibo eman dute. Beraz, 65 zentro eta 5.425 plaza dituen Gipuzkoako egoitza sarean, orain arte 225 lagunek jaso dute alta, koronabirusarekin kutsatuta egon diren pertsonen %41ak. Alarma egoera ezarri zenetik 160 heriotza eman dira eta 163k diagnostiko positiboarekin jarraitzen dute.
Desinfekzio lanetan, San Juan de Diosen
Desinfekzio lanei erreparatuta, Diputazioak azaldu duenez, azken orduetan berriro desinfektatu diren guneen artean dago Arrasateko San Juan de Dios ospitalea. Horiekin batera, Zumaiako San Juan eta Otezuri, Beasaingo Arangoiti eta Zumarragako Argixao ere desinfektatuta dituzte suhiltzaileek eta DYAko boluntarioek eta ekipo espezializatuek. Desinfekzio lanak lau egunetik behin egiten dira kasu positiboren bat duten egoitzetan eta astero gainontzekoetan.
