Gaur goizean Donostian elkartu da Jose Ignacio Asensio Gipuzkoako Ingurumen diputatu eta GHK-ko presidentea Gipuzkoako zortzi mankomunitateetako ordezkariekin, tartean Debagoieneko ordezkari Maite Antonekin.
GHK-ko presidentearen esanetan, mankomunitateetako ordezkariekin egindako bileran aztertu dute Zaldibarko zabortegian izandako lur-jausiak ekarri duen egoera, eta gainera, Mutiloako zabortegia betetzear dagoenez hemendik gutxira itxi egingo dela.
Egoera horretan, Bergarako lurretan kokatuta dagoen Epeleko zabortegia hondakin industrial ez arriskutsuentzako lurraldeko aukera bakarra izango litzateke kontsortzioaren hitzetan; ez badira behintzat hondakinak beste lurralde edo autonomia erkidego batzuetara bideratzen.
Kontrako bertsioa
Debagoieneko Mankomunitateko presidentea, aldiz, ez dator bat Ingurumen diputatu eta GHK-ko presidenteak bileraren ostean azaldutakoarekin. Antonek dio, hondakin industrialen kudeaketa ez dela inolaz ere Gipuzkoako Hondakinen Kontsortzioaren eskumena eta joan den astean GOIENAri azaldutakoa berretsi du, hau da, momentuz, Epele ez dela alternatiba. "Epeleko zabortegia ez dago martxan. Hori berriz ere zabaltzeak suposatuko luke, batetik, gaia Europatik pasatu beharra eta ez hori bakarrik, baita hilabeteak eta milioi eta erdi eurotik gorako gastua ekarriko lukeen obra zibila egitea". Erantsi du, GHK-ren bertsioa ezin daitekeela inolaz ere ondorioztatu gaur goizeko bileratik, batzar informatiboa izan delako, hutsean.
Maite Antonek berretsi du, Epeleren etorkizunaz ez duela erabakirik hartu Mankomunitateak. Gaia batzordetik pasatu ere ez dela egin eta joan den astean azaldutakoa dela gaur ere esateko dutena, hau da, Zaldibarkoa pasatu aurretik ere bi aukera zituztela mahai gainean: zabortegia Mankomunitateak kudeatuta martxan ipintzea, bata; eta zabortegiko bigarren zeldaren zigilatze lanak egin eta behin betiko ixtea, bigarrena".
