ALBISTEAK

Auzia epaia emateko prest

Ordaindu eta Eskuratu elkarteen eta Mondragon Korporazioaren arteko epaiketako ahozko bistaren azken eguna izan da gaurkoa. Bi aldeetako abokatuek ondorioak aurkeztu dituzte epailearen aurrean, eta lau egunak nola joan diren ikusita, esan daiteke demandatzaileen aldeko ebazpen bat izatea zaila dirudiela.

Demandatzaileen abokatuaren ondorioak

Demandatzaileen abokatu Raul Tenesek hartu du hitza saioaren hasieran. Tenes eten barik saiatu da Fagor Etxetresnak lantegiaren eta Mondragonen arteko lotura eta bigarrenak lehenengoaren erabakietan izan zuen esku hartzea azpimarratzen. Abokatuaren esanetan, jarraipen zehatza egiten zen Mondragonen aldetik eta 2011 eta 2013 urteen artean Mondragonek hartu zituen erabaki guztiak egoeraren jakitun zelarik.

Hala, “kontakizun” bat helarazi zutela nabarmendu du. Tenesek, Javier Retegik batzar baten erabilitako hitz hori erabili du behin eta berriz “Mondragonek bazkideei helarazi zien mezuaz” aritu denean. Aipatu du, Retegik batzarrean esan zuela, “plan hori” aurrera eramateko ezinbestekoa izango zela bazkideengan eta kanpokoengan konfiantza sortzea. “Kontakizun horrek gidoi bat izan du”, azpimarratu du Sunion bulegoko abokatuak. “2011ko bukaeratik aurrera, kontakizun bat osatu zuten Mondragoneko zuzendariek, Fagor Etxetresnen lehiaketa atzeratzeko. Jakinik espektatiba faltsu bat sortzen ari zela, mina sortzeko helburuaz”.

Elkartasunaren errezeta magikoa

Abokatuak esan du, “elkartasunaren errezeta magikoa” izan zela Fagor Etxetresnetako zuzendariek bazkideei igorri zieten mezua. Horrela lortu zen soilik, Tenes aburuz,bazkideen %20k eskatzea diruaren itzulera. Horietatik soilik bik egin zuten
demanda, eta bi horiek ez ziren Ordaindu eta Eskuratu elkarteetako kideak. “Nola ez, planaren alde egiten zuten bazkideek eta ekarpenak kooperatiban mantentzearen alde, esaten baitzen, horrela ez bazen, hurrengo egunean bertan egongo zirela lehiaketan”.

Raul Tenesek azpimarratu du lekukotzen bitartez argi gelditu dela Fagor Etxetresnetako zuzendarik plangintza hondamendia izan zela. Aurreikuspen falta handia izan zuten, bere ustez, eta haien erabakiak izan ziren galerak eragin
zituztenak.

Zuhurtzia eza

Mondragonek zuhurtzia gehiagorekin ibili behar zuen demandatzaileen abokatuaren arabera. “Zehaztasun handiagoarekin jokatu”. Aldiz, “erabaki zuten korporazioaren intereserako Fagorrek etorkizuna ziurtatuta zutela esatea”. Raul Tenesen ustez, bazkideak ez zeuden prestatuta, ekarpenean gainean eta finantza kontuetan ezagutza txikia zutelako.

Mondragonek dio epea likidazioarekin batera hasten dela eta guk diogu 2015ko otsailera arte ez zitzaiela komunikatu bazkideei dena galdu dutela. Hau da, kooperatiban baja otsailean eman zitzaien gutun bidez, Bengoetxeak baieztatu zuen moduan, eta horrenbestez urtebeteko epe barruan egin zen demanda.

 

Mondragonen abokatuaren ondorioak

Arantza Estefania Mondragonen abokatuak hartu du hitza Tenesen ostean. Estefaniak demanda bat egiteko oinarri juridikoak behar direla eta egitateak frogatu egin behar direla nabarmendu du. Azpimarratu du demandaren arabera Mondragonek bere interesen alde jokatu zuela eta hori erabat ezeztatuta gelditu dela bistako lau egunetan. "Berebiziko garrantzia" eman dio, egun hauetan, eztabaidatu diren "hainbat gai dagoeneko hartzekodunen lehiaketan ebatzita" gelditu zirela. Esaterako, lehiaketa ezustekoa izan zela eta han ebatzi zela ez zitzaiela informaziorik ezkutatu hartzekodunei, tartean Ordainduri eta Eskuraturi.

Gainera, arantza Estefaniak aipatu du, Mondragon ez dela talde bertikal bat edo Holding bat, eta hori hartzekodunen lehiaketan frogatuta gelditu zela, kooperatibak independenteak zirela ebatzi zelako. "Dokumentazio urteetan aztertu ondoren, argi esaten da Fagor Etxetresnak kooperatibak bakarrik hartu zuela lehiaketara joateko erabaki Mondragonen esku-hartze barik".

Beste norabide bat

Arantza Estefania abokatuak azaldu du, badirudiela demandatzaileek epaiketan zehar "euren argumentuetan sinisteari utzi" diotela. Hori esateko oinarritu da, prozeduran zutabe izan diren gai asko demandanteek ez dituztela ahozko bistan aipatu ere egin. "Tu Lankide aldizkariko artikuluen eta Txema Gisasolak Forum Europan emandako hitzaldiaren gainean, hain zuzen".

Azpimarratu du, gainera, saioetan eta ondorioetan batzarretako aktetan jarri duela fokua Raul Tenesek, eta "erabili diren guztietatik bi bakarrik direla Mondragonen organoenak". "Baten ere ez dira agertzen engainuaren arrastorik, soilik Korporazioaren kezka azaltzen bertan da", esan du Arantza Estefaniak.

Demanda preskribatuta

Mondragoneko abokatuaren arabera, demanda jartzeko epea, 2014ko uztailaren 29an hasten zen, eta urtebeteko epea zuten horretarako. Izan ere, "ekarpen ekonomikoak jasotzeko epea egun horretan iraungitzen" ziren Estefaniaren aburuz. Demanda 2015eko azaroan aurkeztu zuten elkarteek. Beraz, abokatuaren esanetan, preskribatuta egongo litzateke.

Lekukoek berretsi dute

Abokatuaren hitzetan, epaitegitik igaro diren lekukoek argi berretsi dituzte hainbat puntu garrantzitsu. Besteak beste, "ekarpenen erantzukizuna Mondragoni pasatu nahi izan zaio, baina Korporazioak figura horiek, ekarpen bereziak eta merkataritza maileguak, ez dituela erabiltzen argi utzi zuen Arantxa Laskurainek, eta Fagorrenak direla aipatu zuen". Gainera, Estefaniaren aburuz, lekuko guztiek esan dute "erabaki estrategikoak kooperatiba bakoitzak hartzen zituela modu independentean".

Mondragonen balorazioa

Korporazioak azken saioaren ostean azaldu zuen "frogatuta" gelditu dela "Mondragonek ez zituela Fagor Etxetresnetako
eta Edesako bazkideak engainatu", eta ez zuela bi kooperatibetako erabakietan parte hartu. "Kooperatiba bakoitza
autonomoa da eta bere erabakiak hartzen ditu, hirugarrenen esku-hartze barik", azaldu zuen korporazioak.
 
Mondragonek erantsi du ez zuela informaziorik ezkutatu, ez zuela informazio faltsurik igorri eta inoiz ez zuela esan
ekarpenak bermatuta zeudenik. Gainera, elkartasun mekanismoak ezarri zituela eta 331 milioi euro eman zituela Fagor
Etxetresnak eta Edesa laguntzeko, nabarmendu du korporazioak. Horrez gain, epaiketan zehar Mondragonen ustez oso argi gelditu da "bazkideek kooperatibaren egoera erreala" ezagutzen zutela eta "informazio eguneratua" zutela.
Enpleguarekiko erakutsi duen konpromisoa ere nabarmendu du Mondragonek, "kaltetutako bazkideen gehiengoari irtenbide bat" eman zaiola nabarmenduta.

Demandanteen balorazioa

Ordaindu eta Eskuratu elkarteek ere euren balorazioa egin zuten atzo, ahozko bista amaitu ondoren. Elkarteen aburuz, "Mondragon korporazioko bertsio kapitalistenaren biktimak" izan dira bazkide ohiak. Hala ere, Mondragonek Fagor Etxetresnen krisian izan zuen erantzukizuna epaileak kontuan hartuko duelakoan daude.
 
"Korporazioaren benetako aurpegia" argi ikusi dela nabarmendu dute elkarteek, eta ahozko bista bukatu ostean "poza"
azaldu dute. "Epaitegian Fagor Etxetresnetako eta Mondragoneko zuzendari ohiek sistematikoki egin diote uko egiari",
azpimarratu dute, "bazkideei konfiantzazko mezua igorri zitzaiela ukatu dute eta".
Elkarteek gogora ekarri dute "Mondragonen kontseilu orokorrean fikziozko kontakizun bat asmatu" zutela eta hori aktetan
ikusi dela. Mondragon ez zela "edozelako hirugarren bat" gaineratu dute, "baizik eta erabateko eragina zuela kooperatibetan", eta "bazkideek etorkizuneko berme bat balitz bezala hartzen zituzten mezuak".

 

 

 

Erlazionatuak

Ordaindu/Eskuratu eta Mondragonen arteko auzia: hirugarren eguna

Arrasate Bergara

Hiru izan dira bai demandatzaileen eta baita demandatuen galderei erantzun dieten testiguak… eta Mondragon Taldeak deituta, bi perituk ere h...
Perituak eta lekukoak Mondragonen alde, gaur ere

Debagoiena

Ordaindu eta Eskuratu elkarteen eta Mondragonen ahozko bistaren hirugarren egunean, Sergio Treviñok, Xabier Bengoetxeak eta Ane Alkortak dek...
Ordaindu/Eskuratu eta Mondragonen arteko auzia: bigarren eguna

Arrasate Bergara

Bigarren eguna izan du Ordaindu eta Eskuratu eta Mondragonen arteko auziaren ahozko bistak, eta Goienako Josu Bilbao kazetariak Bergarako epaitegia...
Mondragon korporazioaren argudioak berretsi dituzte Retegik, Beristainek eta Markaidek

Debagoiena

Mondragonen kontrako epaiketaren bigarren auzi-saioa egin da gaur goizean Bergarako epaitegian. Aurreikusita zeuden lau lekukoetatik hiruk bakarrik...
Ordaindu/Eskuratu eta Mondragonen arteko auzia: lehen eguna

Arrasate Bergara

Ordaindu eta Eskuraturen, eta Mondragon taldearen arteko auziaren ahozko bista hasi da. Aurreikusita zeuden bost lekukoetatik lau pasatu dira epail...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.