"Zuzendaritzaren kudeaketa negargarriek ekarri gaituzte gauden lekura"

Edesa Industrial-eko eta Geyser Gastech-eko langileek, bizi duten egoera salatzeko, elkarretaratzea egin dute gaur, uztailak 19, Arrasateko Herriko Plazan. Ez dute esperantza larregi bihar aurkeztuko dieten bideragarritasun planaren inguruan: "Gure susmoa da plan horrek murrizketa gehiago ekarriko dituela".

Langileen ordezkaritza zabala elkartu da Arrasateko Herriko Plazan, eta Edesa Industrialeko langileen batzordeko buru Rikardo Perezen arabera ia plantilla guztiari eragiten dion suspentsio lan erregulazio baten aurrean aurkitzen dira: "Zuzendaritzaren azken erabakiek ziurgabetasun eta babesgabetasun egoera baten aurrean utzi gaituzte, etorkizunak zer ekarriko digun ez dakigula. Horrez gain, 30 langileren aurkako kaleratze kolektibo baten tramiteak abiatu dituzte".

Murrizketa gehiago ekarriko dituen susmoa

Perezek langileen aurrean irakurri duen oharrean argi utzi du langileek zein iritzi duten: "Zuzendaritzaren kudeaketa negargarriek ekarri gaituzte gaude lekura. Oraindik ezagutzen ez dugun bideragarritasun plan baten inguruan hitz egin digute, baina susmoa dugu plan horrek murrizketa gehiago ekarriko dituela langileontzat. Ez dugu onartuko langileak kontuan hartuko ez dituen eta irteera faltsuak ekarriko dizkigun planik". Perezek Goienari adierazi dionez, bihar 16:30ak aldera emango du zuzendaritzak bideragarritasun plan horren berri.

Ordezkari politikoen presentzia

Hainbat izan dira elkarretaratzearekin bat egin duten ordezkari politikoak. EH Bilduren Gipuzkoako politika arduradun Unai Larreategi, Ezker Anitzako diputatu eta koordinatzaile nagusi Isabel Salud eta Elkarrekin Ahal Duguko Jon Hernandezekin batera, Arrasateko zinegotzi Eneko Barberena eta Itxaro Artola (EH Bildu), Victoriano Fuentes (PSE-EE), Igor Urizar eta Eva Abuin (Baleike) eta Juan Luis Merino (Irabazi) izan dira, besteak beste.

Erlazionatuak

Etzi, eguena, aurkeztuko dute bideragarritasun plana

Arrasate Eskoriatza

"Beharrezkoa den birfinantzatzea sinatzea faltan, bideragarritasun planaren xehetasunak bukatzen" diharduela jakinarazi du Edesa Industrialek komun...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.