2017an ere batuko dute baserri ingurunean sortutako plastikoa

Debagoieneko Landa Garapen Elkarteak beste urte batez eskainiko du baserri ingurunean sortutako plastikoaren bilketa zerbitzua. Igo egin dute bilketa kopurua, zortzi hilabetetan beharrean, bederatzitan egingo dute eta. Urtarrilaren 24an izango dute baserritarrek plastikoa ateratzeko aurtengo lehenengo eguna.

2000. urtean hasi zen Debagoieneko Landa Garapen Elkartea baserri ingurunean sortutako plastikoaren bilketa egiten, eta zerbitzu hori eskaintzen jarraituko du 2017an ere. Baserritarren artean erantzun ona izaten duen ekimena izan ohi da, batezbeste gero birziklatu egiten diren 2.500 kilo plastiko jasotzen dituzte-eta bilketa bakoitzean.

Baserrian erabiltzen diren askotariko plastikoak biltzen dituzte zerbitzu honekin, esaterako, siloa estaltzeko edo belar boletan erabiltzen den plastiko beltza; negutegietan eta ortuan lurra estaltzeko erabiltzen den plastiko beltza; eta negutegietako plastiko zuria. 

Hileko azken martitzenetan

Aurten zortzi hilabetetan beharrean, bederatzitan egingo dute bilketa; apirilean, ekainean eta abuztuan kenduta, beste hilabete guztietako azken martitzenean. Debagoieneko Landa Garapen Elkarteko teknikari Agurtzane Diazek azaldu duenez, baserritarrei eskatzen zaie plastikoa arratsalde-iluntze aldean ateratzea, garraiolariek hurrengo egunean goizean goiz jasotzeko. Aurrez zehaztutako hogei puntutan beti jasoko dute plastikoa, eta leku horietara eroan ezin duenak aurrez abisatzen badu, bila joateko konpromisoa adierazi du Diazek.

Urtarrilaren 24a izango da plastikoa ateratzeko aurtengo lehen eguna, informazio gehiago gura dutenek, edo leku finkoetan beharrean, plastikoa beste nonbait biltzea gura dutenek, 943 76 25 47 telefonora deitu behar dute.

Erlazionatuak

Plastikoa biltzeko egutegia zehaztu dute

Debagoiena

Plastiko bilketa egunak zehaztu ditu Debagoieneko Landa Garapen Elkarteak 2017rako, eta bilketa lekuak zeintzuk diren gogorarazi. Horietako lekuren...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.