Ekimenaren sustatzaileek proiektuaren arrakasta nabarmendu dute: "Jaso dugun erantzuna da bai gazteak eta bai nagusiak oso pozik daudela, eta haien iritziz oso interesgarriak direla elkarlanean egiten dituzten jarduerak. Gainera, gazteen partetik, adierazi digute oso onuragarria dela horrelako ekimen baten parte izatea haien esperientziarako", adierazi du Sarachagak.
Bergarako Udalak urte asko daramatza Auzolandegiak programarekin lanean, eta horrelako ekimen bat Bergaran egin ahal izatea "eskertzekoa dela" adierazi du Artolak: "Ikusi besterik ez dago egoiliarrek zein gustura erantzuten duten. Bisita honetan nabarmen ikusten dena da egoiliarrak oso gustura daudela gazteekin, eta ekimen honen bitartez, gainera, aukera asko zabaltzen dira uda sasoian egin ezin izango litezkeen gauza batzuk egiteko".
Bide onean
Udaletxetik eta Mizpirualde egoitzatik jasotako erantzunarekin, Auzolandegiak egitasmoak jarraipena izatea nahi dutela adierazi du Sarachagak, eta baita ere, azpimarratu du asmoa dela aurtengoa bezalako parte hartze handiarekin jarraitzea etorkizunean sortu daitezkeen beste proiektu batzuentzako.
