Aurkeztutako hamabi bakarrizketariren artetik aukeratu zituzten oholtzan izan ziren bostak. Eta horiek askotariko estiloak eta begiradak plazaratu zituzten. Egunerokotasuna, intimitatea eta gizarte-gaien inguruko hausnarketa eraman zuten oholtzara umorearen bidez, eta barreak ez ziren falta izan.
Saioa Asier Kortabarria Asier K bergararrak gidatu zuen eta Maria Blanco umorista izan zen gaueko gonbidatu berezia. Bien ekarpenei esker publikoarekin konexio zuzena sortu zen.
Jardun Euskara Elkarteak, Goiena Komunikazio Taldeak eta Bergarako Udalak antolatu dute, Errekaren eta Bedelkarren laguntzarekin. Eta antolatzaileen esanetan bigarren edizio honek berretsi egin zuen Algaraka formatu berriak interesa piztu duela bai ikusleen artean, bai euskarazko sormenaren esparruan.
