Lesarriko tunelak 20 urte bete ditu egin zenetik, eta, ordutik lau erorketa izan dira tunelean. Teknikariek tunela segurua dela adierazi arren, segurtasuna handitzeko lanak direla adierazi du Iñigo Cadarsok, Lesarrik tuneleko obrako arduradunak. "Tunela segurua da, baina, erabiltzaileei segurtasuna ziurtatzeko proiektu hau egin dugu; segurtasun hori handitzeko. Tunelean leku estua da, eta, hogei urte eta gero obra egitea ezinbestekoa iruditu zitzaigun".
Aurrera begirako azterketak egiteko onura
Bidegiko sail teknikoak tunela birgaitzea erabaki du, eta lan horretarako egin beharrekoak nola egiten ari diren zehaztu du Cadarsok. "Eibarretik Arrasateraino, tunel guztiak telarekin daude, eta , tunelak aztertzeko arazo bat da. Hau da, ezin dugu ikusi fisurak sortzen diren. Hori horrela, obra honekin tela horiek kendu, eta, beste sistema batekin jarriko dugu inpermeabilizazio hori, eta, azterketa horiek errazago egin ahal izango ditugu. Horrez gain, buloiak sartuko ditugu puntu konkretu batzuetan, eta, tunel osoan zehar gunita errefortzu bat ezarriko dugu, epe luzera begira tunelaren bizitza luzatzeko".
Segurtasuna aurrena
Tunelaren sarreran, bypassa jarri dute, eta pasabidea zazpi hilabetez mantenduko dute. Horrekin batera, lanak aurrera eraman aurretik, segurtasunari garrantzia handia eman diotela adierazi du Cadarsok, lanegunetako lehen orduetan auto-ilarak sortu ahal ziren beldurra zutelako. "Normalean halako obretan, obrako kotxe guztiak eta kamioiak zuzenean autopistatik sartzen dira, baina, kasu honetan, sarbide ezberdinak sortu ditugu lanetarako sartu-irtenak erraztuz… Bypass-ari dagokionez, ahalik eta errepide mozketa laburrena egiten saiatu direla ere adierazi du obrako arduradunak.
Epe luzerako lanak
Lanak apirila amaierarako amaituta izatea aurreikusten da, eta udako etenaren ondoren, 2024ko irailean, hodia Behobiarako norabidean berritzeko obren bigarren faseari ekingo zaio berriro, eta trafikoak bypass-etik desbideratuko dira. Bypass hori hodi berrituan jarriko da, Gasteiz noranzkoan. Lanak, osotasunean, 2025eko maiatzean amaituko dira.
