Omenduak izateko motibo berezirik ez dutela dio Ibarzabalek, baina hala ere estimatzen dutela: "Ez dugu ezer berezirik egin, 50 urtetan kuota ordaindu, elkarteaz gozatu... Egia da kultura arloko ekitaldietan lagundu dugula baina omenaldi bat egiteko moduan... Estimatzen da, hala ere". Fernandezek ere eskertu du: "Migel Angel eta biok auzokoak gara, elkartetik 40 metro eskasera bizi gara. Beraz, ilusio egiten digu auzoan omenaldi bat jasotzeak; ez dugu Everest igo edo Frantziako Tourra irabazi, baina 50 urtez hemen egon gara".
Esandako moduan, goiz osoko egitaraua izan dute elkartearen 50. urteurrena ospatzeko. Hamaiketakoa, meza, Bergarako Musika Eskolaren orkestra gaztearen kontzertua eta bazkide guztiendako –gaur egun 30 bat dira– bazkaria izan dute: menestra, itsas-zapoa amerikar erara eta tarta.
