Jaurlaritzako Garapen, Jasangarritasun eta Ingurumen Sailak Ingurumen Baimen Bateratua eman zion aurreko astean Valogreen Paper BC enpresak Bergaran jarri nahi duen plantari. Orain, ingurumen-inpaktuaren inguruko azalpenak eman ditu.
Eusko Jaurlaritzaren arabera, Ingurumen Administrazioari buruzko Legean ezarritako "autosufizientzia- eta hurbiltasun-printzipioak" aplikatuko dira Larramendin. Ohar bidez zehaztu du Valogreen enpresak "ingurumena zaintzeko plan bat" aurkeztu beharko duela, eta bertan, kontrolatu beharreko parametroak, parametro bakoitzerako erreferentzia-mailak, analisien edo neurketen maiztasuna edota laginketa- eta analisi-teknikak –eta laginketa-puntuen kokapen zehatza– azaldu beharko dituztela. Horrez gain, Jaurlaritzaren arabera, analisi gehiago ere egin beharko dira jarduna neurtzeko.
Berotegi-efektuko gasei dagokienez, Jaurlaritzak azaldu du metano isurketek karbono isurketek baino inpaktu handiagoa dutela planetan, baina era berean metanoa dela papergintzako sektoreak gehienbat isurtzen duen gasa: "Paperaren sektoreak isuritako gasa metanoa da batez ere, eta metano horrek eragindako berotze-faktorea karbonoak eragindakoa baino 25 aldiz handiagoa da. Hortaz, garrantzitsua da isurpenak murriztuko dituen kudeaketa egitea, EAEn egiten ari garen bezala".
Hirigintza-bateragarritasunari buruzko txostenari lotuta, honakoa adierazi du Ingurumen Sailak: "Ingurumen-organoak kutsaduraren prebentzio eta kontrol integratuari buruzko araudian xedatutakoa betetzen dela ziurtatu du, eta izapidetzearen esparruan, ingurumeneko baimen bateratuaren eskaerarekin batera, proiektua plangintzarekin bateragarria dela egiaztatzen duen hirigintza-txostena aurkeztu da". Gehitu dute, besteak beste, Bergarako Udalaren dekretua baliorik gabe geratu dela: "Bergarako Udalak beranduago onartu zuen dekretua, eta hortaz, gaur egun, prozeduran ez dago jarduerari buruzko txosten urbanistiko negatiborik".
