Luis Mari Mujika, Balento, 81 urteko bergararra Durangaldeko Mugarra mendian hil zen domekan, bertan izandako ezbehar baten ondorioz.
Goizeko hamaikak pasa zirela gertatu zen ezbeharra; mendizalea sakan batetik erori zen. Esperientzia handikoa bera, alabarekin zegoen une horretan eta horiek eman zieten abisua larrialdi zerbitzuei. Helikopteroan hurbildu ziren ezbeharraren tokira, baina iritsi zirenerako jada hilda zegoen.
Azkarruntz auzoko Balento baserrikoa zen mendizalea, eta herrian oso ezaguna. Egun bere kabuz ibiltzen zen arren, duela urte batzuk Pol Pol mendi elkarteko kide izandakoa zen, elkartetik azaldu dutenez.
Mendian ez ezik, beste hainbat kiroletan ere aritu izan zen gaztetan, Bergaran. Ezagutzen zutenek adierazi dutenez, kirolari eta herriari asko emandako pertsona zen Balento.
Pol-pol elkartearen izenean senideei eta lagunei doluminak helarazi nahi izan dizkio Erañak, eta gaineratu duenez, berarekin bizi izandako uneak memorian izango dituzte betirako.