Ume gutxiago irten arren danborradak ez du kolorerik galdu

Azken urteetan beheranzko joera du sanmartinetako umeen danborradako partaidetzak; iaz ez ziren 300 ume izatera heldu eta atzo 250 bat irten ziren. Kopuruak kopuru, giro ederra jarri zuten ibilbide osoan zehar; helduekin ez bezala, umeekin ederto portatu zen eguraldia. Amaitu dira sanmartinak eta, balorazio ofiziala egiteke, sentsazioa da "oso ondo" joan direla.

Helduekin ez bezala, umeekin eguraldia ondo portatu zen. Eguraldi ederra egin zuelako atzo iluntzeko umeen danborradan. Hori bai, helduen danborradako parte hartzea urtez urte gora joan bada azken urteetan, kontrakoa ari da gertatzen umeen danborradarekin. Iaz ez ziren 300 partaide izatera heldu eta aurten 250 bat ume izan dira. Danborrada posible izan dadin ikastetxeek egin duten lana goraipatzeaz gain, beheranzko joera horri buelta emateko asmoa agertu du Udal Gobernuak.

'San Martin' eta 'Pertxa'

Kalejira San Martin plazara heldu zenean, urtero legez, San Martin eta Pertxa ereserkiak jo zituzten eta ondoren, parte hartzaile guztien gozamenerako, txokolatea eta bizkotxoa banatu zuten. 

"Oso ondo" joan diren festak

Amaitu dira San Martin jaiak eta Udal Gobernuak oraindik balorazio ofiziala egiteke badu ere, lehen sentsazioak dira jaiak "oso ondo" joan direla. Partaidetza "oso handia" eta eguraldi ona oro har. Hain justu, eguraldiak  domeka gaueko helduen danborrada zapuzteko ahalegin guztiak egin zituen, eta neurri baten desitxuratu zuen ekitaldi berezia, baina bergararrek oso ondo erantzun zuten. 

Erlazionatuak

Umeen danborrada sanmartinak girotzen

Bergara

Umeen danborradak borobildu zituen San Martin jaiak atzo arratsaldean. 

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.