Herritarren artean ahalik eta afekziorik txikiena eragiteko asmoz, Udalak abuztuko oporrak aprobetxatu ditu hainbat obra egiteko. Esanguratsuenen artean dago bergararren artean oso erabilia den Gabiriako tunela. Abuztuaren 6an itxi zuten, tunela inpermeabilizatzeko argiteria hobetzeko eta hormei eusteko lanek eraginda.
Hasierako asmoa zen abuztu bukaerarako tunela irekita izatea, edota, beranduenez jota, irailaren 2rako, baina abuztuan izandako horniketa arazo batzuek irekiera hori atzeratu dute. "Urarena zen arazo nagusia. Lehen fase batean, oihalak jarri dira hormen bi aldeetan eta goiko partean urak bideratzeko, eta bigarren fase batean argiteria hobetuko da eta kanalizazioa egokitu", adierazi du Obra eta Zerbitzuetako zinegotzi Juanjo Azulak.
Oihal gutxi, eta berandu
Bigarren fase hori San Martin jaien ostean gauzatu beharko dela aurreratu du Azulak, eta dio "ahalegin guztiak" egingo dituztela tunela lehenbailehen irekitzeko: "Oihalak berandu eta behar genituen erdiak heldu ziren abuztuan. Horregatik, presaka ari gara lanean orain eta ahalegin guztiak egingo ditugu lehenbailehen erabilgarri egon dadin", gaineratu du Azulak.
Izan ere, ezin da ahaztu irailaren 9an ikasturte berriari egoitza berrian ekingo diola Miguel Altuna lanbide heziketak (zuzendariari elkarrizketa irakurtzeko, ikus 9. orria) eta ordurako tunela irekita izatea komeni dela. Atzo helarazitako ohar baten, Udalak dio "ahalegin guztiak" egingo dituela San Martin jaietarako irekitzeko. Geotunel enpresari esleitu zion obra Udalak, 48.109 euroko aurrekontuarekin.
