Aranzadi Ikastolako ikasleek zuzeneko konexioa egin dute Nick Hague astronautarekin

Arantzazu Ezkibel Galdos 2019ko mai. 17a, 14:39

Nazioarteko Espazio Estazioan dagoen Nick Hague astronautarekin zuzeneko konexioa egin dute Aranzadi Ikastolan. Urtebeteko lana egin dute "ametsa" gauzatu ahal izateko. Hamar minutuko tartea izan dute astronautarekin berba egiteko: zer jaten duen, nola bizi den, denbora nola neurtzen duen... jakin dute.

Maider Jorge Gabilondo ikasleak izan zuen proiektua egiteko ideia. Ideia ametsa bihurtu zen, eta Ikastola guztia buru-belarri lanean jarri zen. Urtebete luzeren ondoren, Ametsak espaziora bidali dituzte.

Homologatutako 14 irrati-amateur

Gaur egin dute zuzeneko konexioa Nazioarteko Espazio Estazioan dagoen Nick Hague astronautarekin. Horretarako irrati-amateurren laguntza izan dute. Aranzadi Ikastolan Jon Sistiaga, Felipe Uriarte eta Alex Escartin irrati-amateurrak egon dira; horiek Australiako beste irrati-amateur batekin egin dute konexioa eta hark egin du konexioa Nick Hague astronautarekin.

Nabarmendu behar da mundu guztian 14 irrati-amateur daudela homologatuta ISS-rekin konexioak egiteko –horietako bat Australiakoa–.

Konexio guztia modu analogikoan egin da, irrati kableen bitartez –hemendik Australiara 15 mila kilometro kable erabili dituzte, gutxi gorabehera–. Teknologia digitalaren bitartez egitea debekatuta dagoela azaldu du Sistiagak.

Estazioak ordu erdian ematen dio bira Lurrari

Nazioarteko Espazio Estazioa lurretik 408 kilometrora dago, eta segundoko 7 kilometroko abiaduran mugitzen da. Ordu eta erdian ematen dio bira lurrari. Bada, estazioa Australia gainetik pasa den unean egin dute konexioa.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak