Gureak Candy zenera ekartzeko adostasuna

Gureak taldea Candy zenaren eremuan kokatzeko hirigintza hitzarmena aho batez onartu zuen udalbatzak atzo, uztaileko ohiko osoko bilkuran. Udal Gobernuarendako inportantea zen jabe bakar bati bideratzea 20.000 metro koadro inguru hartzen duen eremu hori eta pozik azaldu dira jabe hori Gureak izango delako.

Gainera, Udalak erabilera publikorako eremu bat berreskuratuko du eta bertan, besteak beste, aparkaleku batzuk kokatzea da asmoa.

EH Bilduk aldeko botoa eman zion hitzarmenari, Gureak etortzea positiboa dela uste dutelako baina betiere aldez aurretik gobernuarekin erabilera komertziala mugatzeko aldaketa bat adostu ostean. Erabilera komertzial erraldoiak ekiditeko, plan berezia martxan jartzen denean neurri hori hartzeko konpromisoa eskatu dio EH Bilduk gobernuari eta adostasun batera heldu dira bi aldeak.

Azterketa sozioekonomiko berria

Bestalde, galderen eta eskaeren tartean Irabazik eskatu zuen martxan jartzear dagoen azterketa sozioekonomikoari ingurumen ikuspegia ere txertatzea. 1970ko hamarkadan Siadeco enpresak egin zuen azken azterketa sozioekonomikoa, adituek goraipatu izan dutena, eta orain, gobernuaren ustez, eguneratu egin behar dena. Alkateak uste du orain dela horretarako une egokia.

Irabaziren arabera, "zaplazteko handia" izan da ingurumen ikuspegi hori azterketa horretarako pleguetan ez sartzea. Hala ere, Irabazirendako orain bertan kezkagarriagoa dena da Bergarako bi familia etxe kaleratze baterako arriskuan daudela eta gobernuari eskatu zion epaiketa heldu aurretik lanketa bat egin dezala.

Bukatzeko, EH Bilduk kezka azaldu zuen Udaleko kanpo zein barne komunikazioan azkenaldian euskarari eman zaion tratamenduagatik. 

Erlazionatuak

Irailean hasiko da Gureak lehengo Candyn lanean

Bergara

Orain arteko espazio faltari aurre egitea eta jarduera ekonomikoa handitzea asmoz, Gureak-eko 70 bat langile Candy zeneko 5.130 metro koadroko pabi...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.