Agorrosingo ur txorrotetarako, umeen iritzi bila

Bergarako Udalak aurreikusten du 2019ko udarako gertu egongo dela ur txorroten gunea Agorrosinen. Hala, atzo, Jardunen udaleku irekietan ari .diren umeek 20 bat aukeraren artean txorrotarik gustukoenak bozkatu zituzten. "Argi dute zer gura duten", dio Elena Lete alkateak.

Jakinekoa da egun beroenetan Agorrosingo igerilekuetan edukiera arazoak izaten direla eta bainua hartzeko sorosleek txandak antolatu behar izaten dituztela.

150 metro koadro, 160.000 euro

Arazo horren aurrean Udal Gobernuak irtenbide ezberdinak aztertu eta erabaki zuen Agorrosingo berdegunean bertan ur txorroten edo ur jolasen gune bat kokatzea. Irudiotan ikusten den eremuan joango lirateke gune berri hori, 150 metro koadro inguru hartuko lituzke eta aurrekontua da 160.000 euro ingurukoa.  

Hala, jolasak zeintzuk izango diren erabakitzeko gobernuak erabaki du udalekuetako umeen iritzia eskatzea. Alkateak nabarmendu du umeek begi onez ikusi dutela proiektua eta argi dutela zer den gura dutena.

Adin ezberdinetako umeek erabili ahal izateko, txorrota handien eta txikien artean aukeratu behar izan zituzten.

Udalekuetako umeen iritzi horiek jaso ostean opor osterako idatzita izango dute proiektu oso; asmoa da udazkenean obrak hastea eta 2019ko udarako gune berria erabiltzeko gertu izatea. 

EH Bilduk ez du begi onez ikusten

Bestalde, EH Bilduk ez du proiektua begi onez ikusten. Oposizioko talde nagusiak uste du gune berria Agorrosinen jarrita erabiltzaileak asko mugatzen dituela, besteak beste, kiroldegiko erabiltzaileak izan behar direlako. Baliabide naturalak aztertzearen aldekoa da EH Bildu, eta diotenez, berez eskasa den berdeguneari 150 metro koadro kentzea ez da egokia. 

Erlazionatuak

EH Bildu: "Lehendik jendez gainezka dagoen eremuan jolas gehiago eskaintzea ez da aukera egokiena"

Bergara

Bergarako EH Bilduk ez du begi onez ikusten 2019rako ur txorroten gune berria Agorrosinen jartzeko Udal Gobernuak duen proiektua: "160.000 euro ing...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.