Hainbat arrain hilda agertu dira Deba ibaiaren bazterrean

Jokin Bereziartua Lizarazu 2018ko ots. 13a, 11:38

Deba ibaiko uretan eman den isurketa baten ondorioz, Soraluzen eta Bergarako Osintxu auzoan hainbat arrain hilda agertu ziren atzo, otsailak 12. Udaltzaingoak atzo izan zuen gertaeraren berri: "URA agentzia jakinaren gainean zegoen gu bertaratu ginenerako. Uste dute arrainak atzo goizean izandako isurketa baten ondorioz hil zirela, baina isurketa non eman zen eta nork eragin zuen ez dakite oraindik".

Atzo eguerdian 112 zenbakira deitu zuen herritar batek, eta ondorioz Osintxura bertaratu ziren Bergarako udaltzainak. Hala ere, ordurako Ur Agentziako langileak lanean zebiltzan, Soraluzen "milaka arraian" agertu baitziren hilda.

Lehen hipotesia isurketa bat egon dela izan da, eta hori dela eta, une honetan Deba ibaiko hainbat puntutan dabiltza lanean Ur Agentziako hainbat langile, Ertzaintzarekin eta basozainekin elkarlanean. Bergara erdigunean, Mekolalden, Osintxun eta Soraluzen dihardute, hain zuzen ere. Helburua, Soraluze eta Antzuola arteko errekatik lagin ezberdinak ateratzea da.

Bergarako udaltzainek azaldu duten moduan, "aspaldian ez da horrelako ezbeharrik gertatu errekan". Izan ere, Ur Agentziako langile batek Goienari azaldu dioenez, ezbeharra "oso larria" izan da, "milaka arraina hilda agertu direlako bat-batean". Osintxun eta Mekolalden arrainen bat edo beste agertu dela ere baieztatu dute Ur Agentziako langileek, baina "arraroa" iruditu zaie Osintxun, ibaiak dituen txoko eta irla txikietan, arrain gehiagorik ez agertzea.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak