2018tik 2021era arteko kirol arloko plan estrategikoa martxan jartzear denean, Bergarako Udaleko Kirol Zerbitzuak 2018ra begirako nobedadeen berri eman du. Batetik, BPXport enpresarekin datozen lau urteetarako kontratua luzatu dutela iragarri dute, urtero Udalari 415.000 euroko inbertsioa suposatuko diolarik.
3.500 abonatu eta egunero 1.000 erabiltzaile
Agorrosin kirol guneak 3.500 abonatu inguru ditu gaur egun eta, Kirol Zerbitzuaren arabera, egunero bataz beste ia 1.000 erabiltzaile ditu.
2018rako nobedade aipagarrienak
2018rako prestatutako berritasun nagusiak honako hauek dira:
• Agorrosinen, egubakoitz arratsaldetan eta zapatu goizetan jarduerak emateko eskaintza handitu da, edozein jardueretan dabilen erabiltzaileak hirugarren edota laugarren eguneko aukera izan dezaten: egubakoitzetan 17:30ean eta 18:30ean, eta zapatuetan 10:30ean eta 11:30ean multitraining eta areto bizikleta –bideospinning moduan ezaguna–.
• Tasak egokitu egin dira, malgutasunez jokatu eta hainbat jarduera desberdin egin ahal izateko, Hala, estra bat ordainduta aukera izango da lehorreko beste jarduera berrietan parte hartzeko.
• Osasun azterketak egiteko Medical clue sistema berritzailea jarriko da martxan. Horren bitartez, abonatu guztiek aukera izango dute doan arazo kardiobaskularrik duten detektatu, eta beraien egoera fisikoa eta estresa gainditzeko gaitasuna ezagutzeko.
• Doako kirol orientazio zerbitzua, orain arte fitness aretoan izan dena, esparru gehiagotara zabalduko da. Hala, doaneko zerbitzu honen bitartez nornahiri entrenamenduak osatzen lagunduko diote.
• Udaleko Kirol Zerbitzuaren arabera, bideo areto txirrindularitza sistema oso ondo funtzionatzen ari da. Hamar saio daude eskuragarri, euskaraz eta hiru maila ezberdinetan. Gela libre dagoenean aukera dago bideoetako bat aukeratu eta areto txirrindularitza lantzeko.
• Jardueretarako materiala berritzen ari da Udala; TRX, pikak, mankuernak, kortxera berriak, aquerobiquerako materiala…
• Nordic walking irteerak programatuko dira martxo erditik aurrera: martxoaren 17an, apirilaren 21ean, maiatzaren 12an, ekainaren 2an eta urriaren 20an. Guztiak Agorrosindik abiatuko dira.
• Abonatuentzako erronkak planteatuko dira igeriketan, bizikletan eta triatloian. Simulazio batzuen bitartez, bi hilabetetarako erronka ezarriko zaie.
