Gauerdia pasata piztu da sua batzokiko lehenengo pisuan, eta bigarrenera ere pasatu da. Su gar handiak sortu dira eta barrutik kiskali egin da. Suhiltzaileak gau osoan zehar izan dira lanean. Balkoitik sartu dira eskailerarekin lagunduta, eta egurrezko atean zulo bat ere egin behar izan dute.
EAJko ordezkariak goizeko bederatziak aldean sartu ahal izan dira kalteak zenbatekoak izan diren begiratzera. Mikel Letek azaldu duenez, itxuraz liburutegian piztu da sua, etxeko armarria daukan balkoiaren gelan, hain zuzen.
Udaltzainen hipotesia da hozkailu batean sortu ahal izan dela sua. Suhiltzaileen lanari esker, garrak ez da teilatura igaro. Beheko pisuan dagoen taberna ere ez da erre, nahiz eta suhiltzaileek erabilitako urak kalte batzuk eragin dituen.
Nabarmendu dute haizerik ez zebilenez, zorionez sua ez dela ondoko eraikinetara pasatu.
Bergarako batzokia San Pedro kalean dago, herriko alde zaharrean. Azkarate Marutegi etxean kokatuta dago eta eraikin honek laurehun urte baino gehiago ditu. Hormetan elementu garrantzitsu ugari dituen eraikin dotorea da.
