DOMEKA: 'Erpurutxo' klasikoaren berrinterpretazioa Bergaran

'Erpurutxo' antzezlaneko protagonistak.
Paraiso Antzerkia konpainiak 'Erpurutxo' lana ekarriko du domeka honetan Bergarara. Zabalotegi aretoan izango da emanaldia, 18:00etan hasita. Sarrera 4 euro ordaindu beharko da.

"Klasikoak klasiko dira edozein arotan garaikide izateko ahalmena dutelako eta Erpurutxo horren erakusgarria da". Hala eman du aditzera konpainiako zuzendari Pilar Lopezek. "Baina jendeak ez du ohiko kontakizuna aurkituko domekako emanaldian, klasikoaren bertsio oso pertsonala sortu baitugu. Izan ere, nahiz eta Erpurutxo-ren istorioa kontatu, beste testuinguru batean kokatuta dago obra". Erpurutxo ipuinean, abandonatzeaz egiten da berba, eta Paraisoko kideek gai horri helduko diote, egungo testuinguruan kokatuta.

Eta alderdi poetikoari dagokionez, hunkitu eta gogoeta egitera gonbidatzen ditu ikus-entzuleak gure Erpurutxo obraren bertsio honek".

Familiarentzako ikuskizuna

Adineko aita baten eta seme baten arteko harremana da kontakizuneko ildo nagusia. "Beraien bizitzan zerbait aldatuko da istorioa kokatzen den gau horretan. Aitak semeari garai batean Erpurutxo-ren ipuina kontatzen zion, eta oraingo honetan beraien arteko erlazioari buelta emateko eta guztiz aldatzeko balioko du".

Lopezek aditzera eman duenez, nahiz eta haurrentzako ikuskizuna izan, helduek ere gozatuko dute: "6 urtetik gorakoei zuzendutako obra da, baina jorratzen den gaia dela eta, heldu asko harritu egiten dira gazteei begirako lana delako".

Paraisoko zuzendariak gogora ekarri du haurrei zuzendutako antzezlanen irakurketa berezia egiten dutela gazteek: "Horrek sormen alderdiari dagokionez bestelako aukerak ematen dizkigu, alde sinbolikoa irakurtzeko erraztasuna baitute haurrek. Modu natural batetan barneratzen dira alderdi poetikoan eta baita sentsibilizazio alorrean, eta badirudi helduoi gehixeago kostatzen zaigula".

Lantalde sendoa

Haurrentzako antzerkia hizki larriz idazten den artea dela ekarri du gogora urteetako esperientzia duen antzerki konpainiako zuzendariak.

Eta Erpurutxo aurrera ateratzeko lanean aritu den lantaldea ere esperientzia handiko profesionalez osatuta dagoela gaineratu du Lopezek: "Iñaki Rikart zuzendari bikaina da, maila handikoa; Aitor Fernandino eta Peio Arnaez aktoreek ibilbide profesional oparoa dute; eta Iñaki Salvador konpositore gipuzkoar bikainaren eskutik entzun dezakegu musika".

Erlazionatuak

EGUBAKOITZA ETA ZAPATUA: MobyDick, Malenkonia eta Izaki Gardenak

Oñati

Gaur eta bihar kontzertuak izango dira Oñatiko Antixena gaztetxean: gaur, egubakoitza, 22:00etan, MobyDick; eta bihar, zapatua, ordu berean, Malenk...
EGUBAKOITZA: 'Potologuak' ikuskizunaren estreinaldia Elgetan

Elgeta

Orain bi urte sortutako 'Bodologuak' lanak izandako harrera onak bultzatuta eta bakarrizketa, gauzak kontatzeko gustuko formatua dutelako 'Potologu...
DOMEKA: 'Asier ETA biok' filma eta solasaldia

Arrasate

'Asier ETA biok' iazko Donostiako Zinemaldian aurkeztu zuten, eta euskal zinemaren saria irabazi zuen. Bultzada horren ostean, Euskal Herritik kanp...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.