Eusko Jaurlaritzako Osasun Sailak behin betiko oniritzia eman dio Arrasateko ur hornidura sistemari, Arrasateko Udalak eta Gipuzkoako Urak erakundeak egindako analitiken emaitzak egokiak direla egiaztatu ondoren. Epe arautuan egindako azken azterketa mikrobiologiko zein kimikoek ziurtatu dute ura edangarria dela eta kalitate estandar guztiak betetzen dituela. Ondorioz, iturriko ura ez edateko azken egunetako gomendioa eta ezarritako behin-behineko neurri guztiak bertan behera geratu dira.
Arrasateko Udalaren esker on mezua
Arrasateko Udalak esker on mezu bat helarazi nahi izan du: "Arrasateko Udalak bihotzez eskerrak eman nahi dizkie herritar guztiei azken egun hauetako egoera konplikatuan erakutsitako jarrera eredugarriagatik. Izandako ur murrizketen aurrean herritarrek adierazitako pazientzia eta ulermena funtsezkoak izan dira behin behineko zerbitzua modurik ordenatuenean kudeatzeko. Bestetik, udal langileen jarrera eskuzabala ere aitortu eta eskertu nahi ditu Udalak, lan orduz kanpoko ardura eta lanaldietarako prestutasuna agertzeagatik. Baita Bergarako Udalari, beraien ur horniduratik ur zisternak betetzeko laguntza emateagatik".
Amaiera eman zaio "ezohiko intzidentziari"
"Ezohiko intzidentzia hau" Gipuzkoako Urak-ek egindako obra batzuen ondorioz eta Zubillaga auzoko ur horniduran izandako matxuraren ostean gertatu ziren, lokatzez zikindutako urak Zalduspeko deposituetan eta udalerriko ur-sisteman sartzean.
