Azaroaren 29an hamaika gomendio biltzen dituen dokumentua aurkeztu zion 50 herritarrez osatutako batzarrak Argitzen deliberazio prozesua sustatu duen 18 eragilez osatutako Mandatu Organoari. Sei hilabete iraun duen deliberazio prozesu berri baten ondoren, Mandatu Organoko kideek erantzun formala eman diote banaka-banaka gomendio bakoitzari, horien garapenerako konpromisoak hartuz: "Gogoeta sakona egin dugu konpromisoak adostu aurretik. Gomendioei koherentziaz erantzuteko, guztien arteko oreka eta osotasuna bermatu nahi izan ditugu. Horregatik, ekintza horiek gauzatzeak dakarren konplexutasuna aztertu ostean, epe labur, ertain zein luzera begirako konpromisoak aurreikusi ditugu, datorren legealdian ere bideratu daitezen", azaldu dute.
Energia kontsumoa murriztera eta berriztagarriak garatzera daude bideratuta gomendioak, eta Mandatu Organoko kideek horietako bakoitza ekarpenekin onartzea erabaki dute; alegia, "aldaketa teknikoak –izan epeetan zein zehaztapenetan– txertatu dira guztietan, bideragarriagoak edo osoagoak izan daitezen".
Era berean, Mandatu Organotik adierazi dute hartutako konpromisoak konpromiso instituzional gisa ulertu behar direla, eta, kasu bakoitzean, konpromisoa gauzatzeko arduraduna izendatu dela. Hartutako konpromiso horiei jarraipena egingo zaie 2027ko lehen seihilekoan; Herritarren Batzarrari egindako urratsen berri emango zaio orduan.
Erantsitako txostenean jasotzen dira xehetasun guztiak.