Senitartekoak eta herritarrak batu ditu hitzorduak, eta bete egin da osoko bilkuren aretoa. Arrasate Musikaleko musikariek interpretatutako Mikel Laboaren Txoria txori kantuarekin hasi da ekitaldia –aurrerago, Laboak berak birmoldatutako Xabier Leteren Izarren hautsa ere jo dute– eta Kortaren seme Aratzek eta herriko alkate Maider Morrasek hartu dute hitza.
Eskerrak emanez eta memoria lana "gertatutako guztiarekin eta denekin" egitearen garrantzia azpimarratuz hasi du bere hitzartzea Aratz Gomezek, eta familiako kide ezberdinek, eurekin oroitzapenetatik abiatuta, idatzitakoei ipini die ahotsa ondoren.
Senitartekoen hitzak
"Enrikek asko maitatzen zuen Arrasate, lana eta bizi egin zuen bertan. Giroa eta jendea asko estimatzen zituen. Arrasateko oroitzapen eta lagun asko zituen. Bere bizitza laburra izan zen, baina oso intentsua. Sumatzen zuen bere atzetik zebiltzala, oso kontziente zen berarekin bukatu nahi zutela, azkenean gertatu zen bezala. Eskerrik asko oroigarri honengatik; ziur egon ez garela ahaztuko", esan du bere ama Kristina Larrañagaren –Kortaren alargunaren– izenean.
Leongo Porqueros herrian jaioa, "euskaldun bat bezala bizi" zela eta "guztiz integratua" zegoela hemen irakurri du, Larrañagaren sendiaren izenean. Eta erantsi du, behin Iparraldera joanda, lagundu zietela ahal izan zuten guztian, Gomez sendiak egin zuen moduan; Aratz guztien artean zaindu zutela; eta bi familien arteko harremana mantendu dutela gaur egunera arte.
"Oroitzapenik ez; galderak, asko"
Aitaren oroitzapen batzuk aipatzea gustatuko litzaiokeela, baina aukera hori 1979ko ekainaren 25ean kendu ziotela esanez hasi du bere hitzartze propioa Aratz Gomezek, eta jarraitu du esanez, oroitzapenen faltan, galderak –galdera asko– dituela buruan: "Ez balitz hain goiz eraila izango, nondik joko luke gure bizitzak? Nor izango nintzateke gaur?... eta horrela galdera asko". Aitaz duena ama, senide, hurbileko lagun eta burkideengandik jaso duela erantsi du: "Zergatik, zertarako eta norentzako hartu zuen bide hura, zerekin engainatu zen, hurbilekoen esanekin osatu dudan puzzle bat da, baina inoiz osatu ezingo dudan puzzlea niretzat. Horrela izanda ere, eskertzen diet, bihotzez, aitaren oroitzapen zati bakoitza eskaini izana guztiei".
Ekitaldian, Udalbatzan ordezkaritza duten alderdi guztiek parte hartu dute, eta Maider Morras alkateak irakurri du, Udalaren izenean, adierazpen instituzionala.
"Eusko Jaurlaritzaren Biktimen Zuzendaritzak 2008 urtean emandako talde inkontrolatuek, eskuin muturreko taldeek eta GALek eragindako terrorismoaren biktimei buruzko txostenaren arabera, Jean Pierre Cherid izan zen atentatuaren egileetako bat. Baina beste hainbat kasutan bezala, honetan ere, ez zen dilijentziarik ireki, ez zen inoiz inongo epaiketarik edo ikerketa judizialik abiatu. Egileek inpunitate osoz jokatu zuten, orduko testuinguruak hala ahalbidetzen zuelako, eta, egun, egia eta justiziarik gabe jarraitzen duzue", adierazi du.
"Beranduegi akaso, baina bihotzez"
Gaineratu du, memoria eraikitzean, gehienetan eskura ditugun iturriak baliatu ohi dituzten arren, horietan ez dela beti gertatutakoa izan zen bezala jasotzen, eta beraz, eurei ere badagokiela orain arte egindako memoria lanketa osatzea eta gertatutakoa izan zen bezala jasotzea: "Memoria zerbait dinamikoa denez, ikerketa eta testigantza berriek memoria osatuago bat eraikitzen lagunduko digute eta, bide batez, baita erreparazio sozialaren bidea jorratzen lagundu ere".
"Izena duenak izana duela esan ohi da. Ba, gaur, Enrike Gomez Alvarez Kortaren
izena ekarri nahi izan dugu giza eskubideen urraketen biktima izaera aitortzeko. Eta
doakizue, gaur, ekitaldi honekin, beranduegi akaso, baina bihotzez, Arrasateko Udalaren eta herri osoaren izenean gure aitortza eta oroimena", esanez bukatu du.
Ekitaldia amaitzeko, Bizikidetza Batzordeko ordezkariek Iñigo Arregi eskultore arrasatearraren Oroimenaren indarra eskultura eta lore-sorta eman dizkiote familiari.
Udalak 2016an ekin zion memoria eta bizikidetza lantzeko bideari, "bertan ordezkaritza politikoa zuten alderdien arteko elkarlan eta kontsentsuei esker".