Arrasateko San Josepe auzuneko etxebizitza bloke bateko behealdean sutea sortu zen atzo, 23:10 bueltan. Suhiltzaileak bertaratu ziren eta eraikin osoa, lau atari, hustu egin zuten. Bizilagun bat Gurutzetako ospitalera eraman zuten, larri, Arrasateko Udalak baieztatu duenez, hainbat erredura zituelako gorputzean.
Arrasateko Udalak adierazi du soto batean eztanda bat egon zela eta hark piztu zuela sua. "Hori dela eta, segurtasunagatik, lau ataritako bizilagunak hustu zituzten suhiltzaileek eta udaltzainek. Edozelan ere, ikusi zutenean gainontzeko hiru atarietan arriskurik ez zegoela, atari horietako bizilagunak etxeetara itzuli ziren gauean bertan", diote udal ordezkariek. "Sutea piztu zen atarikoek, ostera, kanpoan pasatu dute gaua".
Sutearen jatorria ikertu beharra dago orain eta, horrez gain, txosten bat egin dute udal arkitektoek, eraikinaren egoera nolakoa den aztertzeko. "Eraikina ondo dagoela baieztatu dute eta bizilagunak hasi dira haien etxebizitzetara itzultzen", baieztatu dute udal ordezkariek.
