Batzar orokorrean hala onartuta, Leintz Bailarako Ekiolako bazkideak uztailaren 1ean hasiko dira instalaziotik energia jasotzen. "Gaur egun, berez, instalazio horrek sortzen du energia, baina oraindik ez daukagu gure kontratuetara lotuta. Hala ere, hilaren 1ean Garaiako instalaziotik zuzenean hasiko gara energia jasotzen", dio Iñaki Aranburuk, Ekiolako kontseilu errektoreko lehendakariak.
Modu horretan, abuztuaren 1ean jasoko dute lehen faktura bazkideek. Gaur-gaurkoz, Garaiako instalazio fotovoltaikoak sortzen duen energiaren %72 esleituta dute bazkideen artean eta kontseilu errektoreko lehendakari Iñaki Aranburuk argi azaldu duenez, helburua da %100 esleitzea, ahal den heinean, familia bati edo etxebizitza bati emanez. "Gainontzeko %28 horrek sortzen duen energia sarera botako dugu, zerbait kobratuko dugu eta kooperatibarendako onura bat izango da, baina hori ez da gure helburua, baizik eta ahalik eta gehien partekatzea instalazio horrek sortzen duen energia".
Beraz, garbi dute bazkide berriak erakartzen jarraitu behar dutela oraindik eta, bide horretan, gakoa izango da egungo bazkideak energia jasotzen hastea, Aranbururen esanetan. "Espero dugu jendea animatzea. Pentsatzen dugu, ikustean gainontzekook jasotzen ditugula halako instalazio batek ematen dituen onurak, apreziatuko dutela. Guk jarraituko dugu, ahal dugun neurrian, bazkide berriak erakartzeko lanean", bukatu du Aranburuk.
Horretarako, bazkidetza kanpaina martxan du kooperatibak eta leintzbailara.ekiola.eus webgunearen bitartez egin daiteke hori, galdetegia beteta.
