Gaur iluntzeko sari banaketa galarekin amaitu ziren egubakoitzean hasitako Arrasate Hiria nazioarteko XXX. lehiaketa eta XLIII. Gipuzkoa akordeoi-lehiaketak, haur, gazte eta senior mailetan.
Reis izan da onena aurten
Esandako moduan, Jessica Reis izan da XXX. Arrasate Hiria nazioarteko lehiaketako garailea. Lehenengo fasean 7 nazionalitatetako 12 partaidek jo dute, Espainia, Serbia, Ukraina, Frantzia, Portugal, Txina eta Errusiakoak, zehazki. Bertan, akordeoirako originala den haien aukerako obra bat eta Louis Aguirre konpositore kubatarraren Les Masques de Neige piezaren bi mugimendu interpretatu behar izan dituzte.
Epaimahaikideak nazioartean ospe handia duten Iñaki Alberdi, Ander Telleria, Na Song, Stefan Hussong, Heidi Luosujärvi eta Pascal Contet izan dira eta zortzi lehiakide aukeratu dituzte finalerako. Horien artean, lehiaketa irabazi duen aipatutako portugaldarra.
Gipuzkoako lehiaketak
Ohitura denez, Gipuzkoa mailako ere ospatu dira asteburu osoan zehar. Adinaren arabera hiru kategoriatan sailkatu dira: haur maila, gazte maila eta senior maila.
Epaimahaikideek honako jotzaileak saritu dituzte: haur mailan lehenengo saria Urtzi Larrabeitik eskuratu du; bigarren saria Laura Cabo Rodriguezek; eta hirugarren saria Alexia Maria Ileak. Gazte mailan lehenengo saria Hegoi Bértolo Sancetek eskuratu du; bigarren saria, Martie Sainz Elorzak; hirugarrena Andoni Gonzalez Iparragirrek. Azkenik, senior mailan, Gipuzkoa Lehiaketako mailarik altuenean, lehenengo saria Ibon Asua Iratxetak eskuratu du; bigarren saria Teodor Marinovek; eta hirugarren saria Gabriel Dominguezek.
Gazteen arteko akordeoiarekiko zaletasuna, "une onean"
Gainera, zapatuan, XXXV. Gipuzkoa Akordeoi Jaialdia ere antolatu zuen Hauspozek. EAE eta estatu osoko 246 ume eta gaztek haien irakasleekin prestatutako lana erakusteko aukera izan zuten egun osoko egitarau aberatsean. Gipuzkoa Akordeoi Jaialdia izaera ez lehiakorreko jaialdia da, ikasleek publiko aurrean eta beste jotzaileen aurrean lehen emanaldiak jotzeko aukera; bakarkako 7 maila eta 5 talde kategoria ospatu ziren. Aipatu beharra dago, Hauspoz elkarteak adierazi duenez, parte hartzea asko hazi dela lehiaketetako kategoria guztietan: "Gazteen akordeoiarekiko duten zaletasuna une onean dagoen seinale da", adierazi dute.
Lehiaketa eta jaialdiez gain, ekitaldi ugari antolatu ditu Hauspozek asteburuan; egubakoitzean harrera egin zitzaien parte hartzaileei Arrasateko Udaletxean.
