Bi adar eduki ditu manifestazioak, izan ere, batzuk Maiatzaren 1a plazatik abiatu dira eta beste batzuk, berriz, Debagoieneko ospitaletik. Biteri plazan elkartu dira biak eta manifestazio jendetsua iritsi da Herriko Plazara. Han, hainbat manifestu irakurri dituzte, plaza lepo beteta zela.Arrasateko Denon Bizitzak Erdigunean asanbladako kideak oso pozik azaldu dira deialdiak izan duen atxikimenduarekin. "Ikusi besterik ez dago plaza nola bete den, euriari aurre eginez. Poza izan da halako grebarekiko erantzuna eta atxikimendua ikustea herriaren aldetik", azaldu du Itsaso Ruiz de Larrinagak, Arrasateko Denon Bizitzak Erdigunean asanbladako kideak.
Egun osoan zehar greba feminista orokorrak izan duen erantzunarekin ere gustura agertu dira, gaurtik indartuta atera direla nabarmenduz. "Indartuta atera gara. Uda aurretik hasi ginen lanketarekin eta uda ostean berrekin diogu, beraz, nahiko gorabeheratsua izan da. Hala ere, herriaren erantzunak indarrak ematen dizkigu, esanguratsua izan da gaurkoa", gaineratu du Nahia Arnaizek, Arrasateko Denon Bizitzak Erdigunean asanbladako kideak.
Edozelan ere, argi utzi dute gaur ez dela ezer amaitzen, eta aurrera begirako lanketa martxan dutela. Hala, hausnarketarako baliatu dute arratsaldea. "Zaintza sistema publikoaz hitz egiten dugunean, aurrera begira gaude. Hau da, prozesuaren hasieran esan genuen greba eguna ez zela helburua, baizik eta herri akordioan dauden aldarrikapenak lortzea. Beraz, horren inguruan hausnartzen aritu gara".
Arrasatekoaz gain, Bergaran, Oñatin eta Eskoriatzan ere egin dituzte manifestazioak arratsaldean.
