Atzotik aurrera, zabalik dago Arrasateko Errugbi taldearen Garagardo azoka. Askotariko garagardoak dastatzeaz gain, bazkaltzeko eta kontzertuetaz gozatzeko gunea izango da. Atzo Behi Bi Blues taldea aritu zen afaria girotzen, eta gaur Banana Shake talde arrasatearraren kontzertua egongo da. Bihar AZ Gaubelak taldea arduratuko da musika jartzeaz. Aurtengoa, 23. aldia da Arrasate Errugbi Taldeko jai bat baino, herriko jai bat bihurtu dela nabarmendu nahi izan du klubeko presidente den Ramon Barrutiak: "Hogeita hirugarren aldia da, eta hogeita hiru urte pasa ondoren, herriko jai batean bihurtu da. Ez da errugbiaren jai bat, herriko jai bat baizik", nabarmendu du.
Klubetik jakinarazi dute guztira, 2.300 garagardo litrotik gora zain daudela arrasatearren egarria asetzeko. Alderdi gastronomikoari dagokionez, menu zabala prestatu dute: txerri-ukondoa, oilaskoa, saltxitxak eta patatak. Dena, momentuan prestatuko dute, Herriko plazako karpan.
Ohi moduan, kirola ere protagonista izaten da egun hauetan. Zentzu honetan, atzo, Mondragon Unibertsitatearekin elkarlanean, unibertsitateko berrogeita hamar ikasle herri kiroletan aritu ziren.
Kirol hitzorduak
Herri kirolez gain, egun hauetan errugbia izango da benetako protagonista. Bihar goizean beteranoek lagunarteko partidua jokatuko dute Mojategin, 12:00etan hasita, Gaztediren kontra. Arratsaldean, 16:00etatik aurrera, zazpiko txapelketaren txanda izango da. Oraindik talde guztien izen-ematea itxi gabe baldin badago ere, gizonezkoetan Hernani eta 18 urtez azpiko Euskal Selekzioa izango dira bisitari. Emakumezkoetan, berriz, Hernani edo Bera Bera moduko taldeek hartuko dute parte.
