2013an Fagor Etxetresnak kooperatiba arrasatearra eta Edesa hartzekodunen konkurtsoan sartu ostean, bide judizialari ekiteko erabakia hartu zuten bi enpresetako 900 langile baino gehiagok, Ordaindu eta Eskuratu gisa izenpetutako elkarte bidez. Bergarako lehen zenbakiko epaitegiak atzera bota zuen auzi eskea 2018ko uztailaren 27an, Mondragon Korporazioak aurkeztutako lehen alegazioa argudio hartuta: auzi eskea preskribatuta zegoela. Hala, ez zuten "gainerakoa aztertu beharrik izan", eta absolbitu egin zuten "auzi jartzaileen asmo guztietatik".
2018ko irailaren 7an erabaki zuten Ordaindu eta Eskuratu elkarteetako kideek epaiari Gipuzkoako Lurralde Auzitegian helegitea aurkeztea. Ia urtebete geroago, 2019ko uztailaren 2an, heldu zen ebazpena: Gipuzkoako Lurralde Auzitegiak Mondragon absolbitu zuen, Bergarako epaitegiaren ebazpena berretsiz.
Auzibidearekin jarraituz
Ia hiru urte igaro dira geroztik; auzibideak, baina, beste jauzi bat eman du gaur. Ordaindu eta Eskuratu elkarteetako kideek errekurtsoa jarri zuten Espainiako Auzitegi Gorenean, kasazio helegitea aurkeztuz; hots, Gorena baino maila baxuagoko auzitegia batek –Bergarako epaitegia zein Gipuzkoako Lurralde Auzitegia, esaterako– hartutako erabakia Gorenak berak berriz aztertzeko eskaera egin zuten langileek.
Bada, gaur bertan ohar bidez adierazi dutenez, helegitea onartu dute Madrilen. Albiste "garrantzitsua" dela adierazi dute, "onartuak izaten ez diren kasazio helegiteen ehuneko handiagatik".
Behin betiko ebazpena
Afera, beraz, Espainiako Auzitegi Gorenaren eskuetan dago; langileen hitzetan, "urrats garrantzitsua da balizko irtenbide bat bilatzeko". Datozen hilabeteetan ezagutuko da behin betiko ebazpena.
