Umezaintza 1971an sortu zen eta estatuko lan-arloko lehenengo haurtzaindegia izan zen. Auzolagun kooperatiba sortu zuten hamazazpi emakumeen ekimena izan zen; haiek lan egiten zuten bitartean, seme-alabentzako beharrezkoa zuten kontziliazio-zerbitzu hori. "Aurrekaririk gabeko ekintza izan zen, harro sentiarazten gaitu eta merezi duen garrantzia eman nahi diogu", nabarmendu du Rosa Lavín Konfekoop-eko presidenteak.
Estatuko lan-arloko lehengo haurtzaindegia
"Hasieran, langileen seme-alabak soilik zaindu zituzten arren, laster hasi zen Arrasate guztiko haurrak hartzen eta zaintzen", adierazi du Arrasateko Umezaintzako Arantxa Lejarragak. "Bere garaian lan-ministerioan inskribatu zuten, estatuko lehenengo zenbakiarekin. Orduko bi irakasle eta gaur egungo bi irakasle egon gara ekitaldian, laurak emakumezkoak".
Aurrekaririk gabeko ekintza izan zen, eta merezi duen garrantzia eman nahi izan diote emakume horiei Konfekoop-etik. Era berean, orduko emakumeek egindakoaz gain, gaur arte eman diren urratsak ere balioan jarri nahi izan du Lejarragak: "Oso ausartak izan ziren bere garaian, eta gero, gainera, kooperatiba eta hezkuntza ereduetan ere beste dinamika batzuk sortu dituzte, haur-eskoletan, emakumeen laneratzean… Orduan egindako esfortzu berarekin jarraitzea geratzen zaigu gainontzeko guztioi".
Umezaintzaren eboluzioa
Haurtzaindegi kutsuarekin sortu zen, kontziliaziorako zaintza gisa, baina urteen poderioz familien beharra ere ikusi zela azpimarratu du Lejarragak, kooperatiba sortuz, eta Auzolanetik aldenduz. "Kooperatiba integrala sortu zen, gurasoak, kolaboratzaileak eta bertako langileak, eta berehala ikusi zen 0-3 eta 3-6 zikloak oso garrantzitsuak zirela, hezkuntza ere badela, eta bertako irakasleak magisteritza titulua ateratzen hasi ziren… Gero haurtzaindegiaren eboluzioa izan da, ikastolen munduan sartzea, euskara ardatz, eta bailarako beste hezkuntza kooperatibekin urtetan lan egitea. Umezaintza Arizmendi Ikastolaren barruan dago gaur egun, eta berrikuntza proiektu handiekin ari gara".
Hezten eta hazten, dinamismoan
Arrasateko umezaintzaren kasuan, egoera onean egon arren, hobekuntzak beti behar dira, baina, horretan instituzioek egin behar dute lan adierazi du Lejarragak: "Aukera gehiago ematen ari dira kontziliaziorako, gurasotasun-baimenak…, eta horrek gure sektorean hainbat gora-behera ekartzen ditu. Horrez gain, 0-3 eta 3-6 urte bitarteko etapak, haurraren garpenean urte garrantzitsuenak izanda, arlo laboralean eta soldatetan gutxiespena dagoela ere azpimarratu du, instituzio publikoei ahalegin bat eskatuz".
