Herritar guztien ahotan dago aparkatze sistema berria eta sinadura bilketa bat ere abiatu dute, Udal Gobernuari eskatzeko atzera egin dezala eta herri galdeketa bat sustatu. Aste honetan ari dira sinadurak batzen. Bihar, esaterako, San Andreseko Gudari plazan egongo dira eta etzi, Arimazubi plazan, arratsaldeko bostetan.
Hain zuzen ere, herritar batek atera zuen gaia atzoko osoko bilkuran, eta Gobernuari zuzendu: "Ez duzue herritarrengan pentsatu. Izugarrizko nahasmena da, hainbeste kolorerekin. Arazoak konpondu egin behar dira, eta ez sortu", adierazi zuen.
Anuska Ezkurra Gobernuaren bozeramaileak eskerrak eman zizkion osoko bilkurara joan eta kezkak udalbatzarekin partekatzagatik eta nabarmendu zuen aldaketa guztiak direla zailak hasieran. Hala, sistema martxan jartzen denean jarraipena egingo diotela eta aldatu beharrekoa aldatuko dutela zehaztu zuen.
Oposizioko ordezkariek Biteri parkingeko txartelen gaia atera zuten, azalduz txartel horiek edukitzea pribilegio bat dela, are gehiago TAO sistema martxan jartzen denean.
