Seigarren urtez antolatu dute Naturan Jolasean ekimena, Arrasaten. Aurten talde hauek ibili dira eguneko egitaraua antolatzen: Leintz Eskola Kirola, Besaide Mendi Elkartea, Gaztetxeko Guraso eta Haur Asanblada, Txatxilipurdi Elkartea eta Guraso.eus.
Maiatzaren 1a plazan hasi dute goizerako aurreikusita zeukaten ibilaldia. Eta Ingurumen Eskolako irakasle Naiara Corcueraren gidaritzapean, haurrek zein gurasoek, askotariko landareak, loreak eta zuhaitzak izendatu dituzte. Batzuentzat, asko ezagunak ziren, beste batzuendako, berriz, egunero ikusten dituzten landareak edo zuhaitzak izan arren, berriak izan dira horien izenak.
Haur zein heldu, guztiek izan dute naturaz gozatzeko eta naturarekin ikasteko aukera. Izan ere, hori da gaurko egunaren helburu nagusia: natura errespetatzea, naturaz gozatzea eta duen balioa kontutan hartzea.
Gaztetxoek egurrekin, kartoiekin edota pinaburuekin egindako artelanak ere eraman dituzte ibilbidea amaitu den Santa Barbara Azpi natura eremura, eta horiek zuhaitz batean zintzilikatuta ere jarri dituzte.
Arratsaldean ere naturaz gozatzen jarraitzeko aukera izango dute.
