Egubakoitz arratsaldean jakinarazi zuen Aldundiak Gipuzkoako adinekoen egoitzetan zortzi koronabirus kasu berri zeudela; tartean, Iturbide egoitzakoa. 87 urteko egoiliarra zen positibo eman zuena, eta gaur hil da.
Arrasateko egoitzakoaz gain, Irungo Caser Residencial Anakan zegoen adin bereko beste egoiliar bat ere zendu da, eta Eider Mendoza Gipuzkoako Foru Aldundiko bozeramaileak adierazi du bien osasun egoera "oso delikatua" zela: "Zeukaten adinak eta aurretik zituzten patologiek eragina izan dute". Hala, bien familiei "babes osoa" helarazi gura izan die Mendozak. Bestalde, Gipuzkoako egoitza guztietako profesionalen lana errekonozitu gura izan du.
Bestalde, azken orduetan zortzi kasu positibo berri baieztatu dituzte Gipuzkoako adinekoen egoitzetan; Debagoienean, bat bera ere ez.
