2017ko apirilean San Andres auzoan pertsona bat tirokatu zuen gizonezkoa zazpi urte eta erdiko espetxe zigorrera kondenatu du Gipuzkoako epaitegiak, hilketa saiakera delitua egotzita. Sententziak "aldaera psikikoengatik" aringarria ezarri dio eta zigorra "bere gaixotasunerako aproposa den zentru mediku batean" betetzera behartzen du, gehienez zortzi urtez.
Hortaz gain, 18 urtean biktimari hurbiltzeko debekua ere ezarri dio epaitegiak eta guztira, 81.380 euroko kalte ordaina ordaindu beharko du.
Tiroketa Arrasateko San Andres auzoko Bañez Doktorea kalean izan zen, 2017ko apirilaren 12an, 13:20an. Kondenatuak, bi tiro egin zituen hiru seme-alabekin parkean zegoen gizonezko baten aurka, bizkarrez zegoela baliatuta, eta ondoren, autoz ihes egin zuen. Biktimak sorbaldan jaso zuen tiro bat eta zauri larriak ez zituen arren, Donostiako Ospitalera eraman zuten.
Epaiketa, ekainean
Ekainean egin zuten epaiketan akusatuak bere gain hartu zuen 2017ko apirileko gertaera, eta berak tiro egin zuela onartu. Hasiera batean, fiskalak hamalau urteko espetxe zigorra eskatzen zuen, baina zortzira jaitsi zuen. Defentsak eta akusazio partikularrak, berriz, Aita Mennin bete zezala eskatu zuten, "kartzelan bere gaixotasunak okerrera" egingo zuela iritzita.
