2018ko urte amaieran esleitu zitzaion kale garbiketa zerbitzua Cespari, lau urterako. Kontratuaren arabera, miloi bat eta bostehun mila bat euroko kostua izango du zerbitzuak, urteko.
Langile gehiago
Obra, Zerbitzu, Mantentze eta Auzoetako Zinegotzi Oscar Garciak azaldu kontratazio berriak egin dituztela zerbitzua hobetzeko; 13 langile berri daude, eta horietatik bost emakumeak dira. Ordutegian ere aldaketak egin dituzte: goiz eta arratsalde egingo dute lan kale garbitzaileek, astelehenetik domekara bitartean.
Makineria berria dute
Makinerian ere hainbat berrikuntza sartu dituzte: hiru makina garbitzaile berri dituzte, 9 haize-makina berri eta bi ibilgailu elektriko hidrogarbitzaile, besteak beste. Gainera, kainu-zuloak eta kaleko paperontziak identifikatuta egongo dira, eta makinek egiten duten lana ere GPS bitartez jasoko da. Garciak azaldu du asmoa ez dela garbitzaileak "kontrolatzea", baizik eta eskaintzen den "zerbitzua eraginkorragoa" izatea.
Garciak nabarmendu gura izan du kontratu berri honekin auzoetako garbiketa zerbitzua hobetu egingo dela.
Atari digitala kexak eta iradokizunak dituztenendako
Herritarrek kexak edo iradokizunak bidaltzeko aukera izango dute internet bitartez; izan ere, Cespak atari digital bat kudeatuko du, eta Udaleko zerbitzu sailak kontaktu zuzena izango du atariaren kudeatzailearekin.
Cespa, 1976tik
Arrasateko kale garbiketa zerbitzua Cespak eskaintzen du 1976a geroztik. Ordura arte, kale garbitzaileak udaleko langileak ziren –zaborra ere jasotzen zuten orduan–. 1976tik gaur arte kale garbiketa zerbitzuko langilea da Rafael Lopez –erdian–; Jesus Perez eta Jose Sanchez urte batzuk geroago sartu ziren arren, langile beteranoak dira hirurak.