Gaur, urtarrilak 29, egin dute liburuaren aurkezpena, eta bertan azaldu dutenez, 250 zulo ingururi buruzko informazioa jasotzen da: Arrasateko guztiena, baita Aretxabaletako, Aramaioko, Elorrioko eta Eskoriatzako hainbatena ere.
Bi urte eman dituzte Besaide Espeleologia Taldeak batutako informazioa osatzen eta antolatzen, eta bestelako hainbat eduki ere baditu katalogoak: irudi topografikoak, esaterako eta baita Arrasateko kobazuloetan aurkitutako faunari eskainitako atal bat ere.
Arrasate Zientzia Elkarteko kide Jose Angel Barrutiabengoaren esanetan, katalogoak duen interes puntuetako bat da gizartearentzat onuragarria dela.
Esan gainera, herriko haitzuloen sarreran plaka bat jarri dutela izenarekin eta zenbaki batekin, eta zenbaki hori bera erabili dutela liburuan kobazuloa identifikatzen.
Barutiabengoak azpimarratu du era berean, zuloak eta bertan dauden elementuak herriaren lurrazpiko ondarearen zaindu beharreko parte direla. Ildo beretik hitz egi du maria Ubarretxenak: egindako lana eskertzeaz gain, azaldu du horrelako materiala erabilgarri izatea garrantzitsua dela.
Liburuaren 200 ale argitaratu dituzte, eta printzipioz ez da salgai egongo, hainbat erakunde eta taldetan banatzeko asmoa dutelako. Gaurko aurkezpenean gogorarazi dute kobazuloak ez direla dibertsiorako leku bat, eta horietan sartzeko, komeni dela ekipamendu aproposa eroatea, besteak beste.