Baserritarren azoka eta Debagoieneko V. Txakolin Eguna eskutik etorri dira

Arrasateko Udalak hilero antolatzen duen baserritarren azoka egin zuten zapatuan Seber Altube plazan, eta haren baitan, Debagoieneko Mankomunitateko Turismo Sailarekin eta Deba Garaia Landa Garapenerako Elkartearekin elkarlanean egin zuten Debagoieneko V. Txakolin Eguna.

2008an hasi ziren Debagoienean txakolina ekoizten; gaur egun Getariako jatorrizko izendapena duten bost ekoizle daude, eta horietako bik bakarrik dute upategia. Arrasateko Otxia txakolina eta Oñatiko Upain eta Murgialdai etxetakoak dastatzeko aukera izan zen Eusko Labeleko hegaluzea pintxoekin batera.

Ekoizleek eskertzen dituzte horrelako ekitaldiak egitea, aitortzen dute-eta oraindik ere asko direla txakolina kostaldean bakarrik egiten dela uste dutenak. Izotzaren eraginez, iazko uzta ez zen ona izan eta gura baino botila gutxiago bete zituzten, hala ere, errez edateko  txakolin freskoa eta txinparta naturalekoa eraman zuten azokara.

Urrian batuko dituzte aurtengo mahatsak eta oraingoz, iazkoa hobetuko dutelakoan daude.

Hileko hirugarren zapatua izanik, eskualdeko zein kanpotik ekarritako askotariko produktuekin betetako hamabost saltoki ere bazeuden: garaiko ortuko fruituak, –aurtengo lehenengo tomateak, horien artean–, kontserbak, haragia, gazta… Baina produktu bitxiak ere bai, adibidez, Azpeitiko Lasao auzoko Mallubi Etxeak, magnolia zuhaitzaren lorekin egindako likorea eskaini zuen.

 

Erlazionatuak

Bertako ortuetako jakiak bertako txakolinarekin lagunduta

Arrasate

Hileroko baserritarren azoka egin dute gaur, zapatua, Seber Altube plazan; eskualdeko ekoizleen askotariko produktuak –letxugak, zarbak, leka...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.