19:30ean iritsi da Seber Altube plazara atzo gauean frantziar estatuko Meauxeko espetxea utzi zuen arrasatearra, eta ordurako ehunka herritar zeuzkan zain, txaloekin eta besarkadekin jaso dutenak.
Ongi etorri ekitaldian, besteak beste, Miren Amurizak bertsoak abestu dizkio, eta aurreskua ere dantzatu diote. Eusko Gudariak abestuz amaitu dute, eta ondoren Arbolapetara abiatu dira, Arkauzek herriko gainontzeko presoen argazkiekin batera bertan zegoen bere erretratua kendu zezan.
Arkauzek, hitza hartu duenean, eskerrak eman dizkie berari harrera egitera bertaratutako herritar guztiei. Era berean, zera adierazi du: "Ni borrokatzera eraman ninduten helburu horiek lortzeke daude oraindik. Horregatik, animatu nahi zaituztet gaur hemen erakutsi duzuen indar berarekin borrokan jarraitu dezagun bihartik aurrera ere".
Horrez gain, gaur egun espetxean jarraitzen duten Arrasateko sei presoak izan ditu gogoan, eta euren eta gainontzeko euskal presoen askatasuna eskatu du. "Gora Euskal Herria Askatuta! Gora Euskal Herria sozialista! Biba zuek!" oihukatuz bukatu du bere berbaldia.
