'Zinema opari, umorearekin' Ibai-Arteko komertzioetan

Goiatz Arana Begiristain 2015ko mai. 28a, 11:32

Horixe da Arrasateko merkatari eta zerbitzu elkarteak esku artean duen azken kanpainaren izenburua. Ez datza, ordea, zinemarako sarrerak oparitzean, 21 filmen tituluekin (Loreak, Ocho apellidos vascos, Cazafantasmas...) zerikusia izan dezaketen opariak banatzean baizik: 75 opari eta 4.000, guztira. Bezeroak xaxatu gura dituzte; sorpresa faktore horrekin jolas egitera animatu.

Bezeroek ordainketa egiten duten momentuan bertan –Visa Arrasate txartela pasatzerakoan– jakingo dute saririk egokitu zaien edo ez: makinatik ateratzen den papertxoak film baten izenburua badakar, saritua izango da, eta bestela ez. Eta baiezko kasuan, titulu hori izango da opariaren nondik norakoak asmatzeko pista bakarra.

Ibai-Arteko zuzendaritzako Gabino Yarza, Yolanda Sanchez eta Maria Luisa Via.

Sare sozialetan

Facebook-en ere zintzilikatu du kanpaina Ibai-Artek: kanpainarako aukeratu dituzten filmen izenburuak sartzen ari da bertan, ikusteko ea erabiltzaileek zein opari erlazionatzen dituzten horiekin.

Sari ematea, uztailaren 2an

Maiatzaren 18tik martxan dago kanpaina eta uztailaren 2ra arte iraungo du. Egun horretan, osteguna, 20:30ean, egingo dute sari banaketa, Seber Altuben, animatzaile eta guzti.

4.016 Visa Arrasate txartel

Bestalde, Visa Arrasate txartelaren gaineko balorazio oso ona egin du Ibai-Arte merkatari eta zerbitzu elkarteak. 4.016 pertsonek atera dute txartela eta horietatik 1.700 daude aktibo, hau da, 1.700 inguru hilero erabiltzen dira.

Otsail bukaeratik dago funtzionamenduan Visa Arrasate txartela, eta erabiltzaileek %10 eta %15eko deskontuez gozatu ahal izan dute, martxo hasieratik apiril bukaerara arte indarrean egon den kanpaina baten bitartez. Txartela bera ezagutaraztea eta Arrasateko bezero fidelak saritzea izan dira helburuak eta asmoa da irailean beste kanpaina bat egitea. Ildo horretatik, Ibai-Artetik azaldu dute erabiltzaileek ongi erantzuten dietela kanpainei.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak