Arrasateko Udaleko Obra eta Zerbitzu sailak bazuen herriko parkeen eta haien mantenuaren inguruko hainbat informazio, baina ez zegoen modu ordenatu batean jasoa. Horretarako beharra ikusi, eta Antton Zabaleta herriko paisajista gaztearen lau hilabeteko lanaren ostean herritarrek kontsultatzeko moduan dago dagoeneko informazio bilduma, liburuxka erara eta udal webgunean.
Bertan jasotzen dira Arrasateko 13 parkeen historia, zuhaitz eta landareen gaineko datuak, espezieak, bakoitzaren ezaugarriak... eta parkeetan topa daitezkeen artelanen berri, eskultura eta abarrenak.
Lana egin ahal izateko, besteak beste, Arrasate Zientzia Elkarteak eta Mondragon Unibertsitateak emandako laguntza eskertu du Zabaletak.
