250 korrikalari izango dira domekako Udalatx mendi trail lasterketan

Parte-hartzaileen artean egongo dira Espainiako kilometro bertikaleko txapeldun Iñigo Lariz, eta Oihana Kortazar elgetarra. Domekan, 09:00etan abiatuko dira korrikalariak Herriko Plazatik, 21 kilometro egiteko helburuarekin. 

Atzo, martitzena, egin zuten Udalatx mendi trail lasterketaren aurkezpena Ederra tabernan. Antolatzaileek hainbat datu eman zituzten: 250 korrikalari, 21 kilometro, 1200 metroko desnibela eta lau anoa puntu. Horietako bitan jatekoa eta edatekoa egongo da eta beste bietan edatekoa.

Mendi lasterketa antolatu ahal izateko laguntza eman duten babesleak eskertu ostean, Mondraitz taldeko Eneko Urrizalkik, Iñigo Altzolak eta Iker Sarabiak parte hartuko duten izen propietako batzuk aipatu zituzten. Besteak beste, Iñigo Lariz, Imanol Goñi, Iñaki Uribetxeberria, Aritz Kortabarria eta Oihana Kortazar egongo dira. "Izen handiko korrikalariak dira eta ohore handia da guretzat. Baina, garbi utzi gura dugu lasterketa herrikoia dela gurea", esan zuen Eneko Urrizalkik.

Bidea errespetatu

Antolatzaileek bestalde, ibilbidearen gaineko azalpenak eman zituzten. Zintekin markatuta egongo da, eta hori errespetatzeko eskatu zuten. "Harriak erortzeko arriskua dago eta kontu handik ibiltzea eskatzen dugu. Errespetatu markatuta dagoen ibilbidea", esan zuten.

Boluntarioak

Azkenik, boluntarioei dei berezia egin zieten: "Domekan, 07:00etan hasiko gara lanean. Hortaz, boluntarioei dei berezia egiten diegu. Ager daitezela Herriko plazan".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.