Konposta gune berriak, gainera, konpostagailu txikiez osatu ordez, etxola itxurako edukiontzietan kokatu dituzte. Sistema berriaren bidez, espazio gutxiago behar da eraikuntzarako eta merkeagoa ere bada.
Erabilerari dagokionez, Josu Pereda ingurumen zinegotziak azpimarratu du arrakastaren gakoa "aireztatze egokia" dela, barne tenperaturak eta konpostatze prozesuak behar bezala funtziona dezaten. Herritarrek ikasia dute hori dagoeneko, konposta egiteko ikastaroetan aritu baitira. Hala ere, sistema berriarekin aireztatze lanak konplexuagoak izango direnez, Udaleko behargin batek beteko du astean behin lan hori.
Emaitza onak
Udalean oso pozik daude orain arte jasotako emaitzekin, auzo guztietan "A" kalitateko konposta lortu baitute. Hala ere, ez dute ekimena gehiago zabaltzeko asmorik, Peredak azaldu duenez. Izan ere, konposta guneak etxeetatik gertu egon behar du, baina ez gertuegi, eta Udalaren arabera, eraikitzeko baldintzak betetzen dituen gune gehiago ez dago herrian.