AEDko gazte taldea: "Ezberdinak gara, baina berdinak. Euskara dugu komunean"

AEDko gazte taldeak askotariko gazteak elkartu gura ditu euskararen bueltan: "Ezberdinak gara, baina berdinak. Euskara dugu komunean". Euskara elkarteak 18 urtetik gorako gazteendako eskaintza zabaldu gura du, "hutsune hori" bete. Horretarako jaialdi bat antolatu dute Arrasateko gaztetxean, maiatzaren 24rako (22:30); 'Ezberdinak baina berdin' izena jarri diote: "Musikaz, parrandaz eta jolasez gozatuko dugu, euskaraz".

AED egoitzaren atarian prentsa agerraldia egin dute euren asmoen berri emateko. Gazte taldeko Iker Agirrek bete beharreko hutsune hori nabarmendu du: "Lehen Hezkuntzan ludotekak daude, DBHn gazte txokoak eta batxilergo mailarako Ttak! taldea. Baina 18 urtetik gorako gazteendako hutsune bat zegoela ikusten genuen euskara elkarteetatik; hutsune hori betetzera goaz". Iaz gaztetxean egindako topaketa baten "gogoa eta indarra" ikusi zuten eta hortik sortu zen gaur aurkeztu duten taldea. Sortu berria da, hala ere: "Ez dugu izenik eta ezta logorik ere. Baina helburu argi dugu: euskara Arrasateko ahalik eta gazte ezberdinengana heltzea gura dugu, euskaraz goza dezatela", dio Agirrek.

Maiatzaren 24rako jaialdia

Maiatzaren 24rako deialdi berezia egin dute Arrasateko gaztetxean, Ezberdinak baina berdin moduan bataiatu dutena: "Lelo hori aukeratu dugu gure taldearen fisionomiagatik. Askotariko perfileko jendea dago taldean eta beraz, horren estereotipatua dagoen euskararen erabilera horren ideia horri buelta ematea gura dugu. Hau da, askotan perfil zehatz batekin lotzen dugu euskararen erabilera, baina ez da horrela", adierazi du taldeko kide Markel Lopez de Bergarak.

Askotariko perfil hori bera islatu gura izan dute prentsa agerraldirako argazkian: "Skaterrak, eskalatzaileak, motor-zaleak, denetarik dugu taldean".

Erlazionatuak

'Ezberdin baina berdin' jaialdia zapatuan Arrasateko gaztetxean, AEDk antolatuta

Arrasate

AEDk 'Ezberdin baina berdin' izeneko festa antolatu du zapaturako Arrasateko gaztetxean (22:30). Helburu nagusia da 18 urtetik gorakoak euskarara l...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.