Jendearen txalo artean zeharkatu zituzten Arrasateko erdiguneko kaleak Kepa Ruiz de Larrinagak, Lorea Zeziagak eta Oxel Azkaratek, etxerako itzuleran. Senide, lagun eta herritar, askok nahi izan zieten harrera egin urteetan herritik kanpo egondakoei. 35 urte egin ditu Ruiz de Larrinagak, 24 pasa Zeziagak eta 10 Azkaratek. Pozik zeuden jasotako ongietorriagatik.
Ipar Euskal Herritik etxerako bidea egin dute Zeziagak, Azkaratek eta Ruiz de Larrinagak. Espainiako justiziarekin inolako zorrik gabe, pasaportea eskuan itzuli dira. Gatazka eta bere ondorioak konpondu arte jarraitu beharra nabarmendu dute.
Hileko azken egubakoitza zela-eta plazako kale-agerraldira ere batu ziren hiru iheslari-ohiak, eta han ere agurrak, muxuak eta besarkadak. Eta aurreko astean Iparraldetik Bergarara itzulitako Enrike Jauregi eta Miren Aierberekin berriz elkartzeko aukera ere izan zuten, oraingoan Hegoaldean.